GICA gikiha na sab ni Garcia
CEBU, Philippines — Gikiha ni kanhi Dumanjug mayor Nelson Gamaliel Garcia sa buhatan sa Ombudsman sila si Mayor Efren Guntrano Gica ug laing duha mahitungod sa wala nataud nga close circuit television (CCTV) system.
Lakip sa gikiha og kasong gross misconduct, grave abuse of authority ug conduct unbecoming of a public officer mao sila si kanhi municipal administrator Danilo Macoy ug property custodian Visitacion Abelo.
Ang Commission on Audit niadtong Pebrero 26, 2016 nipadala og Notice of Disallowance kang Garcia mahitungod sa bayad ngadto sa M & J Auto ID Corporation sa pagsuplay sa CCTV system sa kantidad nga P1,026,632.72.
Sa maong Notice of Disallowance, ang wala nataud nga mga bahin sa CCTV system nga nagkantidad og P198,560 mao ang gi-disallowed sa COA.
Si Gica nga bise mayor ug maoy acting mayor niadtong higayuna sa pagpalit sa CCTV system ang gipapanubag sa COA lakip sila si Macoy nga maoy nidawat sa mga butang ug si Abelo nga maoy nag-inspeksiyon sa mga napalit nga kahimanan.
Ang COA niluwat og Notice of Finality of Decision niadtong Mayo 25, 2018 apan giingong hangtud karon wala pa gihapon giuli ang kantidad nga P198,560 sa panudlanan sa lungsod.
Una na nga gi-dismissed sa Ombudsman si Gica sa kasong serious dishonesty ug grave misconduct sa pagpamakak sa liquidation report.
Gibali sa Court of Appeals ang desisyon sa Ombudsman ug si Gica nibalik na sa pwesto bisan wala pay finality sa desisyon nunot sa motion for reconsideration nga gisang-at ni Garcia. (BANAT NEWS)
- Latest
