Nagbarug daplin sa karsada gipusil patay

CEBU, Philippines — Patay na nga nahidangat sa tambalanan ang usa ka lalaki nga gipusil sa tulo ka nagsakay og motorsiklo sa dalan A. S. Fortuna Barangay Bakilid, Dakbayan sa Mandaue alas 8 pasado kagahapon sa buntag.

Si Senior Police Officer 1 Michael Limalima sa Presinto 2 sa Mandaue City Police Office (MCPO) niila sa biktima nga si Ernesto Laurente Altejar, 48, lumad nga taga Barangay Calindangan, Dakbayan sa Dumaguete.

Matud ni Limalima nga nagbarug lang ang biktima daplin sa karsada atubangan sa Norkis Trading sa dalan A. S. Fortuna dihang nasigpatan ang kalit nga paghunong sa duha ka motorsiklo nga kolor itom ug puti.

Si Limalima niingon nga ang mga sakop sa kapolisan sa Presinto 2 sa MCPO nga maoy nakatubag sa maong pagpamusil maoy nakadiskubre nga nalakip ang biktima sa drug watchlist sa kapolisan sa Dumaguete City Police Station.

Wala na hinoon nakahatag pa og dugang detalye ang kapolisan sa MCPO kun nganong nahidangat si Altejar sa Dakbayan sa Mandaue diin usab nahitabo ang pagpamusil.

Si Police Chief Inspector Antonio Detuya, hepe sa Presinto 2 sa MCPO, niingon nga nakadagan pa unta ang biktima sa gilay-on nga 300 metros apan gigukod kini sa mamumuno ug gitiwasan sa pagpusil hangtud nga nahagba.

Human sa maong pagpamusil ang tulo ka wala pa hiilhing mga mamumuno dali nga nisibat pahilayo sa maong dapit sakay sa tagsatagsa ka motorsiklo.

Ang kapolisan nakahipos og kopya sa video footage sa pipila ka establisemento apan wala nila maklaro ang mga dagway sa mga mamumuno tungod kay nagsul-ob sila og full-face helmet.

Gitataw ni Detuya nga usa karon sa mga anggulo nga ilang gisusi mao ang kalambigitan sa biktima sa ilegal nga drugas tungod kay ang namatay nga si Altejar anaa sa drug watchlist sa kapolisan. (/GMR)(BANATNEWS)