Life detector

CEBU, Philippines — Mga kahimanan aron dali nga matultulan sa mga rescuer ang mga nalubong nga buhi sa nahitabong landslide sa Barangay Tinaan, Dakbayan sa Naga miabot gikan sa kaulohan.

Gipahibawo ni Office of the Civil Defense regional director Concepcion Ornopia nga duha ka life locator, mini life locator ug thermal camera nga gikan sa ulohan nila nga buhatan ang miabot aron magamit sa nagpadayong search, rescue and retrieval operations sa Sitio Tagaytay ug Sindulan.

Matud ni Ornopia nga gipagamit ang maong mga kahimanan sa 525th Combat diin aduna kini mga kauban nga fiber optic camera ug uban pa. Gikan kini sa mga disaster team sa kaulohan.

Dugang sa pangulo sa OCD-7 nga karong adlawa ang maong kagamitan ilang testingan sa lugar aron pagsuta sa mga tawo nga anaa pa sa ilawom sa yuta.

Iyang gitug-an sab nga padayon ang pag-abot-abot sa mga responder gikan sa lain-laing lugar ug adlaw-gabii ang ilang operasyon nga gipahigayon ilabi na sa dapit diin baga ang yuta nga mitabon sa ubang panimalay.

Samtang si Konsehal Carmelino Cruz Jr., ang emergency operations chief sa Dakbayan sa Naga, mapasalamaton sa tanang ayuda nga nangabot, apan niapelar siya karon sa katawhan nga gusto mopadangat og tabang nga mas maayo mga non-food item ang ipadala sama sa habol, banig, senina ug uban pa, (/DILT)(BANATNEWS)