Mga nakalas nagkondenar?

CEBU, Philippines — Mga uwang sa iro, tingog sa kanding ug agulo sa mga babaye giingong pirmeng madungog sa mga residente sa Sitio Tagaytay Uno, Barangay Tinaan sa Dakbayan sa Naga duol sa lugar diin nahitabo ang landslide ug daghang natabunan.

Matud pa ni Paul Getutua, presidente sa Purok Tagaytay 1 makadungog siya og tingog sa babaye nga daw mag-agulo ug duna say nangayo og tabang ala- una sa kaadlawon.

Matud niya bisan ang ilang mga anak gibati og kalisang matag makadungog sila niini. Apan kon iyang iwagan sa suga diin gikan ang tingog mohilom ra kini.

Laing residente nga si Cresenciano Tapao nitug-an pagkagabii sa adlaw sa pagkahitabo hangtud sa miaging gabii makadungog siya og siyagit gikan sa mga babaye ug lalaki nga nagpakitabang.

Makapanimbawot sa ilang balahibo kay sundan kini sa uwang sa iro ug tingog sa kanding nga maoy mobuak sa kamingaw.

Malaumon si Tapao mopahuway na sa malinawon ang mga kalag sa mga nakalas ug sa mga wala pa maugkat gikan sa ilawom.

Base sa talaan sa command center sa Naga aduna nay 35 ka mga patay, 44 ang missing,  ug 15 ang samaran ug padayon pa ang search and rescue operation nga pirmeng mahunong tungod sa pagbunok sa uwan tungod sa peligro alang sa mga rescuers. Si Archbishop Jose Palma, sa Archdiocese of Cebu kinsa niadto sa mga biktima kagahapon miingon nga mobisita unya sila sa lugar aron kini bendisyonan alang sa mga kalag sa mga nakalas. (/IBM)(BANATNEWS)