SK chairman sikop sa buy-bust

CEBU, Philippines – Nasikop sa buy-bust operation ang chairman sa Sangguniang Kabataan sa Barangay Bayong, Balamban ug kauban niini sa may Barangay Gaas sa maong lungsod niadtong Martes sa gabii.

Ang SK chairman mao si Regie Abanto samtang ang kauban mao si Renan Sotto, taga Barangay Luz, Dakbayan sa Sugbo.

Giingong dili mominus sa duha ka bulan ang pagpaniid sa binuhatan ni Abanto human adunay nadawat nga reklamo ug taho ang kapolisan nga kusog ang pagpayuhot sa ilegal nga drugas sa Barangay Luca nga dili layo sa Bayong, bukirang bahin, ug giingong gikan sa maong SK chairman ang supply. Nasakmit gikan sa dinakpan ang mga pinutos nga ginadiling drugas nga mobalor og dul-an sa P142 mil.

Ang direktor sa Cebu Provincial Police Office, Senior  Supt. Manuel   Javier Abrugena, nagkanayon nga niluwat siya og direktiba nga imbestigaran kun aduna bay kalabutan o kasayuran ang mga opisyal sa barangay sa giingong ilegal nga negosyo ni Abanto. Kini human nasuta nga wala siya sa drug watchlist ug nilutaw lang ang iyang pangalan sa mga dinakpan sa drugas niadtong niaging semana diin siya maoy gitudlong tinubdan.

Dugang ni Abrugena nga dugay na nakadawat ang kapolisan sa Balamban og impormasyon nga adunay kabataan nga nalambigit sa maong ilegal nga negosyo.

Apan nakurat sila nga hasta ang chairman sa SK nalambigit sab.

Nunot niini giawhag sab sa pangulo sa Cebu Provincial Anti-Drug Abuse Office (CPADAO) ang SK nga maoy mangusog sa kampanya batok sa ilegal nga drugas.

Si Ivy Durano-Meca, pangulo sa CPADAO, nagkanayon nga dili kini ang unang higayon nga adunay opisyal sa SK ang nalambigit sa ilegal nga drugas.

Si Meca naalarma tungod kay bisan ang mga piniling opisyal dili na mahadlok nga malambigit sa ilegal nga kalihukan.

Matud niya nga ang SK kinahanglang mohimo og aksyon kalabot niini sanglit alarming nga mismo mga gipili nga opisyal sa gobiyerno ang nisulod na sa ilegal nga drugas. (Camille L. Pateres ug Le Phyllis F. Antojado/GMR)(BANAT NEWS)