Supply sa NFA rice sa Central Visayas wala magkuwang

CEBU, Philippines – Gitataw sa National Food Authority (NFA) nga walay pagkuwang og supply sa NFA rice sa Central Visayas apan ang problema mao ang mga outlet.

Atol sa tigom sa Local Price Coordinating Council (LPCC) sa Probinsiya sa Sugbo, Assistant Regional Director sa NFA-7 nga si Diocano Alojado, Jr.  nagkanayon nga igo ang supply sa bugas sa NFA sa rehiyon ang problema  mao ang outlets nga moapod-apod ngadto sa mga konsumidor tungod kay dili daghan ang retailer diin uban kanila ang nagpa-reaccreditation .

Giingong adunay 413,000 bags sa NFA rice karon base sa ilang inventory ug sa buwan sa Oktubre gilauman nga moabot kini ngadto 750,000 ka bags tungod kay adunay moabot pa nga imported supply. Matud ni Alojado nga walay price movement sa NFA rice karong semanaha ug ilang gipanglantawan nga mokunhod ang presyo niini sa mosunod nga semana tungod kay daghan ang supply nga anaa karon sa ilang mga warehouse.

Sa iyang bahin, si Gobernador Hilario Davide, III niawhag sa mga Local Government Unit (LGU) lakip na usab sa mga kooperatiba nga  motabang sa pag-monitor lakip ug sa pag-apod-apod sa NFA rice sa mga konsumidor.Dugang ni Alojado nga mamahimong makapa-accredit ang ubang kooperatiba ngadto sa NFA aron mahatagan sila og pagtugot sa ahensiya nga moapod-apod sa NFA rice.  (/BDB)(BANAT NEWS)