9 traffic investigators girelibohan
CEBU, Philippines – Giparelibohan sa director sa Cebu City Police Office, Senior Supt. Royina Garma, ang siyam ka traffic investigators sa Traffic Patrol Group human langay nga nakaresponde sa bangga sa South Road Properties niadtong Lunes.
Naatol kini sa graduation sa police recruits sa Police Regional Office-7 sa usa ka mall sa SRP.
Asoy ni Garma nga personal niyang gitawagan ang opisina sa traffic investigator aron respondehan ang insidente apan nilabay na lang ang usa ka oras walay niabot gawas sa taga City Traffic Operation Management (CITOM).
"I learned that hindi pumupunta sa ground ang traffic investigators nasa opisina lang, nire-refer na lang ng CITOM. Mali yun, katamaran yun ng pulis," matud ni Garma.
Sumala pa ni Garma nga dili trabaho sa CITOM ang mo-imbestigar kung dili iya kini sa polis hinungdan nga iya girelibohan ang siyam nga duty atol sa nahitabonga vehicular accident.
Giklaro ni Garma nga ang CITOM igo ra mohimo sa pag-manage sa dalan aron dili magtrapik ug kung walay available nga traffic investigator mahimo ra ang CITOM, isip first responder nga mohimo og sketch sa area ug ihatag sa polis alang sa imbestigasyon.
"Ayaw man nilang lumabas nang opisina to investigate, eh di ilagay natin sa magpatrolya dun sa bundok para maarawan naman sila araw-araw doon at maranasan naman nila paano magtrabaho labas ng opisina," matud ni Garma.
Hayan mag-atubang og kasong neglect of duty ang maong mga narelibohan.
Ang officer-in-charge sa TPG, Police Senior Inspector Dexter Basirgo, nipadala na og suwat kang CCTO operation chief Francisco “Isko” Ouano nga tanang traffic incidents kinahanglang maimbestigar sa traffic investigator sa natungdang police station.
Si Ouano nipadayag nga ang CITOM igo ra motabang aron dili matrapik ang lugar hinungdan nga mokuha sila og drawing ug sketching.
Dugang ni Ouano nga andam gihapon sila makig-alayon sa kapolisan sa tinguha nga makatabang nga dili magmugna og sobrang trapik sa higayon nga adunay aksidente sa kadalanan. (Rowena D. Capistrano/GMR)(BANAT NEWS)
- Latest
