Pletehan sa bus buot patas-an

CEBU, Philippines — Gusto ni Gobernador Hilario Davide III nga dili ipatuman sa Ceres Bus Liner ang pagsaka sa ilang pletehan.

Ang maong pamahayag sa gobernador subay sa pagpasaka og usbaw sa pletehan nga P5 niadtong miaging semana sa bus company nga gi-operate sa Villacar Transit Inc.

“Pero kung mahimo unta dili nila ma-implement. Naglisod man ang atong konsumidor” matod ni Davide.

Ang gobernador nakasabot nga posibleng epekto na kini sa Tax Reform for Acceleration and Inclusion (TRAIN) law.

Nasayran nga ang maong kompaniya mipahibawo sa pagsaka sa ilang pletehan tungod sa pagsaka usab sa presyo sa krudo. Si Davide nagkanayon nga human sa iyang meeting karong adlawa uban sa mga personnel sa Department of Trade and Industry (DTI) buot usab niya nga makighinabi sa mga bus operator aron mahisgotan ug mahatagan og solusyon ang pagsaka sa pletehan.

Si Davide nagkanayon nga ang meeting sa DTI alang usab kini sa paglangkob sa Price Coordinating Council.

“Mag meeting man mi sa DTI tomorrow, how we can do cope sa rising prices sa commodities” dugang ni Davide. (BANAT NEWS)