Tomas subling gilabhan ni Digong

CEBU, Philippines — Sa ikaduhang higayon gilabhan na sab ni Presidente Rodrigo Duterte si Cebu City Mayor Tomas Osmeña kalabot sa butane incident niadtong miaging buwan. Atol sa situation briefing sa Presidente didto sa Laoag, Ilocos Norte niadtong Domingo sa gabii, si Duterte misaway sa gihimo ni Osmeña sa pag-rescue niini sa mga nakalapas sa balaod.

“This guy must be crazy. Pupunta doon sa prisohan tapos ipa-release yung mga nahuli. Those arrested by the police, he demanded the release”, sigon sa presidente.

Gawas niini, gipikhan sab ni Duterte ang mayor gumikan sa matod pa sa kakuwang sa suporta nga iyang gihatag ngadto sa kapolisan sa siyudad.

Sa pagkutlo ning maong balita si Mayor Tomas Osmeña wala pa makahatag sa iyang habig kay wala pa kini magpa-interview sa mga tigbalita.

Apan ang iyang kapikas nga si Konsehal Margarita Osmeña mikomento labot sa hitabo diin matod niya tataw ug klaro nga misinformed ang presidente kabahin sa maong isyu.

“It’s clear that he is misinformed. I think in one newspaper today, it was there, in a report of Ronaldo Malacora regarding to how many as been the assistance of the City, the numbers of cars”, sigon sa konsehal.

Giangkon ni Konsehal Osmeña nga nalain sila nga ang presidente nakadawat og mga sayop nga impormasyon ug nanghinaot kini nga sa dili madugay masayod kini kon unsay tinuod nga istorya.

“He is misinformed that of course we feel bad about that. In the end he will know what the truth is. There are ways of getting the right information”, dugang sa Konsehal.

Mahitungod sa butane incident si Konsehal Osmeña mipasabot nga igo lang miresponde ang mayor sa mga manindahay nga nangayo og tabang kaniya.

Matod niini nga ang mayor magsige og kadawat og text message aron magpatabang or hinungdan nga miadto kini sa police station ug nangutana kun pwede bang buhian ang mga dinakpan ubos sa iyang kustodiya.

“They don’t have lawyers. The only connection they have is the Mayor, because phone number is in Facebook”, matod ni Konsehal Osmeña. (BANAT NEWS)