Checkpoint lakip sa kabukiran pahugtan

CEBU, Philippines — Human sa nahitabong pagpamomba ngadto sa General Santos City niadtong Domingo sa buntag ang Police Regional Office (PRO)- 7 niluwat og direktiba sa pagpahugot sa pagpahigayon og checkpoint ilabi na diha sa mga bukirang barangay.

Niadtong Domingo sa hapon gilibkas sa kapolisan ang red alert status subay sa pagbantay sa kalamidad nga dala ni bagyong Ompong apan butyag sa direktor sa PRO-7, Police Chief Superintendent Debold Sinas nga dakong purohan nga iisa nila kini og balik nunot sa nahitabo ngadto sa General Santos City.

Niadtong Domingo sa udto taliwa sa pagpaubos sa tibuok Mindanao sa Martial Law nibuto ang usa ka improvised explosive device ngadto sa usa ka pharmacy duol sa Hadano Park sa Crossing Makar, National Highway sa maong siyudad diin walo ang naangol sa maong insidente lakip niini ang usa ka 6-anyos nga batang babaye.

Si Sinas niluwat og direktiba sa iyang mga personnel nga pahugtan ang seguridad ug checkpoint ilabi na sa mga bukirang barangay paglikay nga dili maabot nganhi sa Central Visayas ang samang pagpanghulga. (BANAT NEWS)