Nagdala og samurai ug pusil sikop
CEBU, Philippines — Nagtingkagol sa detention cell ang usa ka 39-anyos nga lalaki human nasakmit sa kapolisan gikan kaniya ang samurai ug pusil nga iyang gidala sa nilabay’ng adlaw diha sa Barangay Tawason, Dakbayan sa Mandaue.
Ang nasikop mao si Eric Montejo, ulitawo, residente sa maong lugar.
Matud ni Police Officer 2 Orvin Seth Felicio, desk officer sa Station 6 sa Mandaue City Police Office nga adunay nitawag sa ilang buhatan kabahin sa usa ka lalaki nga nagdaladala og armas hinungdan nga dali kini nilang girespondehan.
Atol sa pagresponde sa kapolisan giingong naaktohan si Montejo nga nagbitbit og 27 pulgada nga gitas-on sa samurai ug aduna pa kini kalibre .38 nga revolver nga dunay duha ka buhing bala.
Si Montejo gituohan nga adunay nakaaway nga kabanay hinungdan nagdala kini og pusil ug samurai. (BANAT NEWS)
- Latest
