Nagmotor gipamusil

CEBU, Philippines — Samtang patay ang duha ka tawo ug usa ang grabeng naangol dihang gipamusil sa duha ka armadong mga lalaki sa dalan H. Abellana sa Barangay Canduman ug eskina Barangay Cubacub, Dakbayan sa Mandaue alas 9 pasado niadtong Domingo sa gabii.

Si Police Officer 3 Kenneth Perocho sa Presinto 6 sa Mandaue City Police Office (MCPO) niila sa mga namatay nga sila si Reynan Mabida, 35, ug Mark Lexter Cagaanan Castillo, 40, pulos taga Purok 2, Cubacub.

Giila ni Perocho ang grabeng naangol nga si Harry Atienza Alterado, 30, taga Zone 4, Canduman, kinsa dali nga gidala sa North General Hospital sa Dakbayan sa Sugbo, human naigo sa saag nga bala samtang nagtambay sa lugar nga nahitaboan.

Matud ni Perocho nga sa pasiuna nilang imbestigasyon ilang nasayran nga sila si Mabida ug Castillo ang nagsakay sa motorsiklo padulong sa eskina Canduman sa Barangay Basak sa maong dakbayan.

Apan kalit lang nitumaw ang duha ka wala hiilhing lalaki nga pulos armado ug dayong pamusil ngadto sa mga biktima.

Human sa pagpamusil ang wala hiilhing mamumuno namiya nga daw yano lang nga naglakaw pahilayo sa maong dapit. (BANAT NEWS)