Sabog gidakop, polis gikarate
CEBU, Philippines — Gikarate sa lalaking gituohang sabog sa ginadiling drugas ang duha ka polis nga buot mosikop kaniya sa Sitio Mananga 2, Tabunok, Dakbayan sa Talisay niadtong Domingo sa hapon.
Una niini, si Eliza Lina, 31, minyo nga nagpuyo sa maong lugar ang nitawag sa kapolisan human si Ramir Ortiz alyas Ondo, 38, ang nagmaoy ug nanghagis sa ilang lugar. Gani hasta ang ginikanan ug igsuon niini ang nireklamo na ug gusto siya’ng ipadakop tungod kay dili na kini makontrol.
Pag-abot nila ni PO1 Genobiagon ug PO1 Lamusao sa lugar ilang nakit-an si Ortiz nga nagbitbit og dos por dos. Gisuwayan sa pagpakalma ang suspek apan nisungasong gyud kini sa paghapak kang Genobiagon ug gisikaran sa iyang tiyan si Lamusao.
Nakuptan nila ang suspek apan nisungay pa gyud kini sa awtoridad nga maayong pagkaigo sa ilang nawong.
Gidala sa Talisay City Police Station ang suspek ug gibalhug sa bilanggoan. Giangkon sa ginikanan sa suspek nga tiggamitan sa ilegal nga drugas ang iyang anak ug andam nga mopasaka og kaso batok sa suspek. (BANAT NEWS)
- Latest
