Feature gikan sa tsirman

CEBU, Philippines — Mahiligon sa musika si Mama Pining, apan wala niya kini gipamugos kanamo.

Apan bisan paman, napasa niya kining iyang hilig sa musika. Kaming duha sa akong igsuon nga si Eddie, nakat-on paggamit og mga instrumento. Makamao mogamit si Eddie og violin samtang ako sa piano. Nakat-on ko og piano bisan walay music sheet.

Gidala ni Mama ang iyang hilig sa musika diha sa unibersidad. Niadtong 1970’s, iyang gitukod ang UV Boy’s Choir aron makaeskuyla nga libre ang mga kabataang may gasa sa musika. Giporma sila aron pakantahon sa nagkalain-laing mga simbahan dinhi sa Sugbo.

Saksi ko kon unsa kadako ang iyang pagsuporta sa choir aron mapalambo ang ilang talento.

Ang UV Boy’s Choir maoy nahimong labing unang Cebuano choral group nga nakadaog sa National Music Competition for Young Artists (NAMCYA) sa Manila. Nabungkag lang ang grupo dihang nitaliwan si Mama niadtong 1984.

Sa akong pagtutok sa mga gimbuhaton sa unibersidad nagbalikbalik sa akong hunahuna ang paningkamot ni Mama pagpalambo sa mga tinun-an sa UV nga may talento sa musika.

Busa, niadtong 1999, agi og pag-ila ug pagtahod sa among inahan akong gibuhi og balik ang University of the Visayas Choir. Di lalim ang mga pagsuway aron mapadayon kini sama sa mga pagsuway nga akong giagian pagbuhi og balik sa The Freeman niadtong 1965 sa dihang nag-edad pa ako og 34.

Ang matag usa adunay misyon sa kinabuhi. Sa akong bahin, akong giisip nga usa ko ka revivalist. Ang pagbuhi og balik sa UV Choir sama sa pagbuhi og balik sa hilig sa musika ni Mama Pining ug ang pagbuhi og balik sa The Freeman sama sa pagbuhi og balik sa pasyon sa pagsuwat sa akong uyoan nga si Paulino.

Nagbalik-balik sa akong panumdoman kaming gibansagang “The Three Musketeers”, ako, silang anhing Juanito Jabat ug Balt Quinain, (malangit unta ilang mga kalag) kon giunsa namo nga mabalik sa kadalanan ang The Freeman nga nagpadayon pa hangtud karon.

Tuig 2006, nagkaproblema ang choir kay di na ganahan ang mga miyembro niini sa ilang choirmaster. Bug-at kaayo ang pasangil batok kaniya. Nakaingon ko, kon tangtangon siya mobalik sa uno ang grupo, mas maayo pang bungkagon na lang.

Apan nausab akong hunahuna ug giusab nako ang pangalan sa grupo nga karon gitawag na og UV Chorale.  Ang akong kapikas nga si Nena mao nay nahimong chorale manager.

Gikan niadto, mas klaro na ang direksyon sa choir. Buot nakong mag-una gyud ang grupo sa uban mao nga mikuha kami og kinamaayohang choral masters sa nasud. Usa kanila si Ms. Anna Tabita Piquero, usa ka award-winning choirmaster ug kanhi singer sa Philippine Madrigal  gikan sa Manila.

Sukad niadto nahimo silang garbo ug kalipay kay nagsige na sila og apil sa mga kompetisyon sa gawas sa nasud. Ang una nilang international competition niadtong 2007 sa Busan, South Korea.

Sila batok sa 39 choirs gikan sa ubang mga nasud. Wa kaayo mi mag-apas nga modaog. Usa ka inilang Filipino conductor, nga nagtudlo og  choral workshops sa abroad,  miingon nga lahi ug mopatigbabaw gyud ang tingog sa mga Cebuanos, apan iyaha ming gisultihan daan nga andamon lang ang kaugalingon kon di mi makadaog.

Pwerte nakong lipaya kay ang UV Chorale man hinuoy naapil sa mga gideklarar nga mananaog.  Akong giingnan ang akong asawa nga murag musika nga nituhop sa akong dughan ug kalag ang akong nadungog.

Ang UV Chorale miawit sa Green and White March Song, ang UV Anthem, nakaingon ko sa akong kaugalingon, napaabot gyud nila ang ilang musika sa kalibotan ug dako kining garbo nga di masukod para nako.

Ang UV Choral maoy nag-inusarang Filipino performing group atol sa World Youth Day didto sa Sydney, Australia niadtong Hulyo 2008. Niawit usab sila atol sa special luncheon performance atubangan sa 400 ka mga Cardinals ug Obispo gikan sa lainlaing mga nasud sa kalibotan.

Human sa ilang pasundayag, daghang mga cardinals ug bishops ang niapas sa gawas aron pagdayeg kanila. Ang Obispo sa Nova Scotia mihatag sa iyang personal World Youth Day souvenir gikan mismo sa Santo Papa sa pag-ingon “Thank you for the gift of music.”

Apan ang makatandog-balatian nga komento nagagikan sa Archbishop of Vienna, Austria. Siya miingon,“ Mr. Gullas, it would be a dream come true if someday, somehow, your UV Chorale, together with our Vienna Boys Choir, could sing in our church.”  — Sumpayan