BIR gikwestiyon sa Ong Kin King

CEBU, Philippines — Andam mobayad ang tag-iya sa Ong Kin King & Co. Inc. sa kuwang nila nga buhis ngadto sa Bureau of Internal Revenue apan kinahanglan nga klaro ang kwentada niini.

Apan pabiling gikwestiyon sa kompaniya ang legalidad sa pagpasirado ingon man sa nagpirma sa closure orders sa walo nila ka establisemento sa Dakbayan sa Sugbo ug Mandaue niadtong Huwebes.

Ang abogado sa kompaniya nga si Atty. Estrella Martinez kinsa kanhi director sa BIR niingon nga ang kamanduan “illegally and erroneously issued” ni BIR Revenue Region No. 13 Director Eduardo Pagulayan.

Kini ang hinungdan nga ila kining gipaabot ngadto kang Department of Finance Secretary Carlos Dominguez, sa mga BIR Commissioners, ubang BIR Regional Directors ug sa buhatan sa Ombudsman.

Si Pagulayan ang nipirma sa closure orders sa mga gipanag-iya sa Ong Kin King & Co., Inc. nga warehouse sa Pier 2 ug sa Arellano Avenue Extension sa Pier 5, Philpos Atlas atubangan sa CTU, sa may eskina Lapu-Lapu ug Magallanes Streets; Harisson Park Beer, Grill and Sizzling Bar sa Osmeña Boulevard ug Apas, Cebu City; ug laing warehouse sa Tipolo ug restaurant sa Dakbayan sa Mandaue City.

Giingong nakalapas ang kompaniya sa National Internal Revenue Code of 1997 labot sa wala pagbayad sa saktong buhis.

Matud ni Martinez nga subay sa Revenue Memorandum Order No. 3-2009 nga giusab sa RMO No. 36-2009, si Deputy Commissioner for Operations Arnel Guballa lang ang legal signatory sa closure orders.

Gikwestiyon sab ni Martinez ang Letter of Authority ni Pagulayan sanglit usa lang kini ka officer-in-charge sa BIR Regional Office ug kini kalapasan gihapon sa NIRC.

Nunot niini giawhag sa kompaniya ang BIR nga kanselahon ang mga closure orders sanglit naghatag kini og dili maayong sumbanan sa umaabot. (/GMR)(BANATNEWS)