Wa pay laing bagyo

CEBU, Philippines — Gipaabot nga moarang-arang na ang tempo sa panahon sa mga mosunod nga adlaw karon nga nagkalayo na ang bagyong  Ompong sa nasud, matud pa sa usa ka opisyal sa Philippine Atmospheric, Geophysical and Astronomical Services Administration (PAGASA) Lapu-Lapu City Station.

Si PAGASA-Cebu officer-in-charge Alfredo Quiblat Jr. nagkanayon nga sa pagkagahapon, gimonitor na lamang ang gikusgon sa hangin nga nakaapekto sa kondisyon sa kadagatan.

Matud niya samtang anaa pa sa sulod sa Philippine Area of Responsibility ang bagyo, kusog gihapon ang pagbira niini sa hanging habagat maong kusog ang hangin padulong sa Probinsya sa Sugbo.

Kagahapon sa 3 p.m. ang bagyo nakalabang na sa amihanang Luzon ug gibanabana nga mogawas sa PAR unyang gabii padulong sa Hong Kong.

Matud niya, human ni Ompong wala na silay na-monitor nga weather system o cloud circulation duol sa nasud. Ang Office of Civil Defense in Central Visayas (OCD-Region 7) mipahibalo nga walay dagkong insidente nga napaabot sa ilang buhatan.

Si OCD-Region 7 Director Concepcion Ornopia nalipay nga naabot sa ahensya ang ilang target nga “zero” casualty ug injury.” Apan magpabiling alerto ang Regional Disaster Risk Reduction and Management Council sa Central Visayas.

Sa pagkagahapon, ang na report lamang kay ang pipila ka pasahero nga na-stranded tungod kay daghang mga biyahe sa pier ug airport nga nakanselar.

Ang Cebu City Disaster Risk Reduction and Management Office (CCDRRMO) nakatala lamang og mga reklamo sa problema sa kuryente, vehicular accident ingon man medical emergencies.

Wa say natala ang probinsya nga mga dagkong hitabo tungod sa bagyo apan adunay dili momenus 148 ka pamilya gikan sa City of Naga, Mandaue City, Lapu-Lapu City ug Dakbayan sa Talisay ang ilang

gipahiklin sa mas luwas nga lugar tungod kay naa sa danger zone ang ilang mga pinuy-anan.

Moabot usab sa 654 ka mga turista ug pasahero ang natanggong sa mga pantalan sa lalawigan apan kagahapon sa hapon gitugotan nang makalawig ang mga barko padung sa Bohol ug Mindanao gawas lang sa mga biyaheng padung sa Leyte ug Samar. (Le Phyllis Antojado, Decemay P. Padilla ug Gabriel Bonjoc/IBM)(BANATNEWS)