Bio-fence mopugong sa basura paingon sa dagat

CEBU, Philippines – Moapil ang kagamhanan sa Siyudad sa Sugbo sa International Coastal Clean-Up karong Sabado sa may South Road Properties sa Barangay Pasil, Sawang Calero, San Roque, Ermita, ug Suba.

Sigun sa pangulo sa Cebu City Environment and Natural Resources Office (CCENRO), Nida Cabrera, nga andam na sila alang sa maong kalihukan ug duna na sila’y designated areas nga limpyuhan.

Matud ni Mayor Tomas Osmeña nga nipagawas siya og memorandum isip tubag sa panawagan nga moapil sa kalihukan.

Gihulagway ni Cabrera nga ang International Coastal Clean-Up natayming sab sanglit ang ilang buhatan dunay gihimong lakang nga maminusan ang mga plastic nga basura nga maadto sa kadagatan.

Ang kagamhanan sa siyudad nagbuhat og bio-fencing ug nahuman na sila sa pag-test niini ug gikatakda nga kini ilusad karong Sabado dungan sa International Coastal Clean-Up.

Napulo ka bio-fence ang ibutang sa CCENRO sa Pasil hangtud na sa mga silingang barangay.

“Ang coastal clean-up joint effort ni kauban pud sa mga barangays kay amo man silang giawhag nga mo-join, duha ka component, clean up ug information drive labi na atong mga naa sa mga coastal nga way mga kasilyas, unya ang city nag-set aside og funds in case wala’y areas ang mga balay mag-identify mi og mga katong gitawag og area nga mabutangan og communal septic tank,” matud ni Cabrera.

Sunod semana gikatakda nga mopahigayon og water test analysis ang CCENRO sa kadagatan sa lima ka barangay.

Gihulagway sa CCENRO ang bio-fence nga makatabang gyud aron ang mga sagbot dili moderetso sa kadagatan. (/GMR)(BANAT NEWS)