Curfew hugtan tungod sa hazing

CEBU, Philippines – Giawhag ni Lapu-Lapu City Mayor Paz Radaza ang mga ginikanan alang sa higpit nga pagbantay sa minor pa nilang kabataan aron malikay nga mabiktima o malambigit sa dautan nga kalihukan.

Kini human naluwas sa kapolisan ang 12 ka minor nga naglakip sa tulo ka babaye nga tinun-an sa gipahigayon nga hazing session.

Gitataw ni Radaza nga dili mahimong magpasagad lang ang mga ginikanan sa ilang kaakuhan sa pagbantay sa ilang mga anak ug ila lang isalig ang tanan ngadto sa kagamhanan.

Nunot niini ang kagamhanan sa dakbayan ang padayon nga nagpatuman sa curfew ordinance alang sa kabataan nga maglaroy-laroy bisan sa lawom na ang kagabhion.

Niadtong Septiyembre 9 ang kapolisan sa Presinto 2 sa Lapu-Lapu City Police Office (LLCPO) ang nakapahigayon sa pagluwas sa 12 ka minor nga gipaubos sa hazing session diin tulo ka hingkod na ang nagpasiugda apan nasikop.

Gihimo kini sa giabandonar nga panimalay sa Sitio Bag-ong Silangan, Barangay Mactan sa dakbayan ug giila ang mga nagpasiugda nga sila si Jomarie Sulit, Charlie Degamo ug Jevan Enecita nga giingong mga sakop sa Young Blood Gangster sa maong dapit. Kasong kalapasan sa Republic Act 11053 o ang Anti–Hazing Act of 2018 ang atubangon sa tulo. (/GMR)(BANAT NEWS)