Draft sa absolute sale sa CICC gipa-review kang Davide

CEBU, Philippines – Nasumitir na sa provincial legal officer Atty. Orvi Ortega ngadto sa buhatan sa gobernador ang draft sa deed of absolute sale sa Cebu International Convention Center (CICC).

Matud ni Ortega nga tumong sa pagsumitir sa draft aron kini ma-review ni Gobernador Hilario Davide, III.

Human ma-review ni Davide ang maong draft isumitir usab kini ngadto sa hunta probinsiyal aron mahatagan og pagtugot ang gobernador nga mopirma sa maong dokumento tali sa Mandaue aron nga hingpit na nga mabalhin sa Mandaue ang pagpanag-iya sa CICC.

Ang kagamhanan sa Dakbayan sa Mandaue nakabayad na kini sa P300 milyones nga kantidad sa CICC. Sa pagkakaron, aduna pay mga butang ang Kapitolyo nga anaa sa CICC ug ang guwardiya pa usab nga hired sa Kapitolyo ang nagbantay sa maong edipisyo apan kon hingpit na kini nga mapanag-iya sa Mandaue kuhaon nila ang mga butang ug ang guwardiya.

Ang Kapitolyo ubos sa administrasyon ni Davide wala na mogasto sa pagpaayo sa CICC human kini naguba atol sa nahitabong linog ug bagyo niadtong tuig 2013.

Sayo pa, si Davide nagkanayon nga dili na mogasto bisan piso ang probinsiya sa CICC hilabina nga nalambigit kini og kaso tungod sa giingong gipaburot sa presyo sa pagtukod sa maong edipisyo sa panahon ni kanhi gobernador ug karon Kongresista Gwendolyn Garcia. (/BDB)(BANAT NEWS)