U-turn slot sa SRP sirad-an
CEBU, Philippines – Dili una maagian sulod sa tulo ka adlaw ang North U-turn slot sa South Road Properties diin mao kini ang agianan sa mga bus ug ubang sakyanan nga gustong molusot sa Barangay Mambaling.
Karong Biyernes sirad-an kini sa alas 12 sa tungang gabii hangtud sa adlaw’ng Lunes.
Ang Department of Public Works and Highways-7 niduol sa Cebu City Transportation Office ug nipresentar nga ang North U-turn slot kinahanglang ayuhon sanglit dunay mga semento nga duna nay mga liki ug uban pa.
“Nipresentar ang taga DPWH diri, nakita gyud nato naa na say nangaguba didto tungod kay dagku gyud ang mga sakyanan, ang ila lang gyud kay di man pwede putol-putolon ang ilang project so nihangyo sila diri sa atong opisina, so gitan-aw nato, gi-evaluate nato unsay maayo so atong gihisgutan diri Friday seguro sa midnight until sa Monday sa alas 4 passable na guro na,” sigun sa operations chief sa CCTO nga si Francisco “Isko” Ouano.
Dugang ni Ouano nga samtang isirado ang North U-turn slot, ablihan nila ang center island nga duol sa usa ka mall diin kuhaon nila ang railings nga giali aron didto una maka-left turn ang mga sakyanan.
Gipanglantawan sa CCTO nga makamugna kini og trapik apan gipasabot ni Ouano nga bantayan lang gyud sa ilang mga sakop ang dagan sa trapiko tungod kay dili man sab mahimo nga ilang idelatar ang pag-ayo ug gani mao kini ang hinungdan nga gitumong nila og weekends.
“Atong ablihan with the DPWH and atong personnel sa CITOM para ma-guide lang gyud sila,” matud ni Ouano.
Matag shift tulo ka personnel ang i-deploy sa CCTO nga mobantay sa dagan sa trapiko sa lugar. (/GMR)(BANAT NEWS)
- Latest
