12 naluwas gikan sa hazing
CEBU, Philippines — Dose ka mga menor de edad ang naluwas sa kapolisan ug tulo ka giingong mga gang members ang gitanggong sulod sa detention sa Presinto 2 sa Lapu-Lapu City Police Office (LLCPO) human naaktohang nagpahigayon og initiation rites pinaagi sa hazing diha sa bakanteng luna sa Barangay Mactan, Dakbayan sa Lapu-Lapu sa miaging gabii.
Ang tulo nga nadakpan nga naglakip sa founder sa Young Gangster sa Barangay Mactan nga sila si Charlie Baguio Degamo, 19, taga Bagong Silang, Barangay Mactan, Dakbayan sa Lapu-Lapu.
Samtang ang laing duha mao sila si Jevan Godinez Eneseta, 21, ug Jomari Jordan Sulit, 21, nagpuyo gihapon sa maong barangay.
Naluwas sa kapolisan ang 12 pa ka mga menor nga naglakip sa tulo ka babaye pulos tinun-an sa public high schools sa siyudad ug nagpangidaron pa gikan12 hangtud 15 anyos giingong nakaangkon og mga bun-og.
Si Police Officer 3 Alfredo Macabodbod miingon nga adunay nanawag sa ilang telepono ug misumbong bahin sa hazing session sa nahisgotang dapit sa ilang pagsubay, naabtan gyud ang tulo ka mga lalaki nga nagpulipuli sa pagpuspos sa mga bata.
Ang mga bata gi-turnover ngadto sa social workers sa siyudad samtang kasohan ang tulo ka rekruter og paglapas sa Republic Act 8049 kon Anti-Hazing Law.
Sa pikas bahin, ang Cebu City naapil sa mga nominado sa Presidential Awards for the Most Child friendly Municipalities and Cities ubos sa kategoriya sa Highly Urbanized Cities nga gipangulohan sa Council for the Welfare of Children.
Tinguha sa CWC nga mamahimong child friendly ang tanang Local Government Units sa nasud.
Ang katigi sa Siyudad sa Sugbo sa maong pasidungog mao ang Ilo-ilo City, Mandaluyong City ug Isabela City.
Ang kriteriya aron mapasidunggan mao ang edukasyon, panglawas ug proteksyon sa mga bata gikan sa mga programa sa LGU. Richel Ann P. Basiga (BANAT NEWS)
- Latest