Usa napusilan sa buy-bust operation

CEBU, Philippines – Usa ang nalandig sa tambalanan, samtang ang usa nagtingkagol sa Station 5 sa Mandaue City Police Office human sa gipahigayon nga buy- bust operation sa may North Road Barangay Basak Mandaue City.

Ang nalandig sa tambalanan mao si Joseph Cabatingan, 18, taga Sitio Alliance sa maong barangay. Samtang ang nagtingkagol sa prisohan si Reynaldo Cabatingan Jr. 22.

Ang duha ka mga suspetsado parehong nalakip sa watchlist sa Police Station 3.

Nasakmit gikan sa duha ang usa ka kalibre 45 sa armas, mga bala, pinutos sa ginadili nga drugas, ug lakip ang buy-bust money.

Si Police Senior Inspector James Conaco sa Police Station 3 milusad sa operasyon gamit ang poseur buyer nga polis ug didto gipangutana kini si Joseph kung mopalit ba kini og drugas ug gitubag kini ug ‘oo.’

Dali nga nimando si Joseph kang Jay-ar nga dawaton ang bayad ug sa dihang nahitabo na ang transaksyon nakabantay si Joseph nga polis ang iyang katransaksyon.

Gikatahong mibunot kini og armas apan naunhan kini ug nasikop usab ang kauban niini.

Si Joseph gidala kini sa Mandaue City District Hospital.

Sa Talisay City, lima ka mga batan-on, tulo niini mga menor de edad ang nasikop human nakuhaan og ilegal nga drugas sa Barangay Mohon.

Si Chief Insp. Ardeolito Cabagnot, deputy chief sa Talisay City Police Station nibutyag nga nagpahigayon sila og checkpoint sa maong dapit ug ilang nadakpan ang mga suspek tungod sa paghupot og drugas.

Nasikop sila si Jevin Abastillas, 20, nga nakuhaan og usa ka medium pack nga shabu; Wilmar Sayingga, 19, ug ang nagpangidaron 17 anyos, 16 anyos ug 14 anyos nga babaye. Ang mga nakuhang drugas niabot sa P300 mil.

Gisubay nila karon kon kinsang mga tawhana ang nagsugo sa mga menor sa ilegal nga transaksyon. (Gabriel Bonjoc/IBM)(BANAT NEWS)