Sugbo nigahin og P2.6 milyon alang sa sewage tank sa CCJ

CEBU, Philippines — Ang kagamhanan sa Dakbayan sa Sugbo gikatakda nga mopatukod sa P2.6 milyones nga underground sewage tank diha sa Cebu City Jail male dorm sa Barangay Kalunasan, Dakbayan sa Sugbo.

Tumong niini nga masulbad ang problema sa kabaho nga moalisngaw gikan sa maong prisohan nga gireklamo sa mga residente diha sa palibot.

Si Konsehal Dave Tumulak, chairman sa committee on public order and safety ug deputy mayor for police matters nibutyag nga ang pundo alang niini adto kuhaon sa Philippine Amusement and Gaming Corporation (PAGCOR) funds.

Matud ni Tumulak nga gisultihan siya sa warden sa prisohan Superintendent Renante Rubio nga ang nagkadaghan nga piniriso nga naa sa pasilidad ang usa sa nakatampo nga dali mapuno ang septic tank sa maong prisohan.

Ang CCJ aduna lang kini 1,500 nga kapasidad apan karon niabot ngadto sa 5,000 ang priso nga niukopar niini.

Kagahapon ang city council ni-approve sa resolution ni Konsehal Jerry Guardo, chairman sa committee on infrastructure.

Matud ni Guardo nga ang Department of Engineering and Public Works sa siyudad nag-andam na sa program of works ug estimates sa P2.6 million underground sewerage tank.

Sa iyang bahin, si Rubio nagkanayon nga ang existing tank gigamit usab sa ubang mga jail facilities sa Kalunasan. Ang siyudad nitabang usab sa jail management sa paghabwa sa hugaw sa septic tank matag semana. -/BDB (BANAT NEWS)