Badlungon nga drayber nakapadatu sa CCTO
CEBU, Philippines — Nisaka ang koleksiyon sa Cebu City Transportation Office (CCTO) karong tuiga itandi sa niaging tuig. Matud sa operations chief sa CCTO, Francisco “Isko” Ouano, nga sa tibuok tuig 2017 niabot sa P83 milyones ang nakolekta nga mas taas og P22 milyones sa 2016 nga naa lang sa kapin P60 milyones.
Karong tuiga anaa sa P100 milyones ang target collection sa CCTO ug masaligon si Ouano nga ila kining makab-ot.
Kini gumikan kay gikan sa Enero hangtud sa Agosto niabot na sa P66 milyones ang ilang nakolekta samtang aduna pay nahabilin nga upat ka buwan sa pagtapos sa tuig.
Matud ni Ouano nga usa sa rason nga taas ang ilang koleksiyon mao ang mga badlungon nga dili mosunod sa lagda sa trapiko ug ang pataka og parking sa ilang sakyanan.
Gikan sa Lunes hangtud sa Domingo ang pag-clamp sa CCTO sa mga sakyanan nga pataka og parking ug sulod sa 24-oras gibana-bana nila nga dili mominus 100 ka sakyanan ang ma-clamp ug ang multa P1,500.
“Wala man ni nato gipasakaan base ra man ni sa mga violators, sila moy nagtukmod nato nganong mosaka ang atong income kay tungod sa naka-violate sila,” dugang ni Ouano.
Gawas sa pag-clamp, ang pag-tow sab sa mga motorsiklo nga pataka og parking ang nakatampo sa pagsaka sa koleksiyon sanglit ang multa niini P2,500.
Kasagaran niini anaa sa dalan Colon ug duol sa mga tambalanan. (GMR) (BANAT NEWS)
- Latest
