Senior citizen gipusil patay

CEBU, Philippines — Patay ang usa ka senior citizen nga ambulant vendor human kini pusila kagahapon sa kadlawon diha sa eskina sa Sangi road ug dalan G. Dela Cerna, Barangay Gun-ob, Dakbayan sa Lapu-Lapu.

Ang biktima giila sa kapolisan nga si Demetrio Llanera, Jr., 67-anyos, residente sa maong lugar.

Matud ni Police Superintendent Eloveo Marquez, pangulo sa Investigation and Detective Management Branch sa Lapu-lapu City Police Office nga gikan sa usa ka bar ang biktima diin nakakita kini og kalalis human adunay mga nagbugalbugal sa mga babaye nga nagtrabaho sa bar.

Sa wala pa mahitabo ang insidente ang biktima naglakaw kini padulong na untang mopauli apan pag-abot niini diha sa lugar nga nahitaboan kalit lang kining gipusil sa wala mailhing mamumuno duha ka higayon sa ulo niini.

Dugang ni Marquez nga ilaha pa karong gisusi kong aduna bay kalambigitan sa nahitabong lalis diha sulod sa bar ang maong insidente. (BANAT NEWS)