Siyudad padayung nagsuporta sa CCPO
CEBU, Philippines — Padayon nga nisuporta ang kagamhanan sa Siyudad sa Sugbo sa kapolisan sa siyudad matud sa pangulo sa Peace and Order Program (POP) nga si Kevin Christer Paz.
Kahinumduman nga si Cebu City Police Office Deputy Director, Superintendent Artemio Ricabo, niingon nga kutob ra sa saad ang kagamhanan sa siyudad sa nag-ung-ong nila nga gihangyo nga hand-held radio ug ubang ekipo. Apan si Paz niingon nga si CCPO Director, Senior Superintendent Royina Garma, ang nagpa-hold sa hand-held radio kay nangayo kini sa specifications sa radyo kay gusto niya nga synchronized kini sa Camp Crame.
“Last August 3, during peace and order meeting namo, siya gyud mismo ang nisulti nga iyang ipa-hold but sad to say dili na nato ma-hold because na-approved na ang PO, so gadagan na siya so if mangayo sila og new specifications sa radio so mag-purchase tag lain which is atong ipa-bid, di na man nato ma-cancel atong 40 ka radio nga para ihatag sa ilaha,” pasabot ni Paz.
Usa ka gatus ka radyo ang ihatag sa siyudad ngadto sa kapolisan diin ang 60 niini una na nga nahatag niadtong Enero atol sa Sinulog sa Police Station 2, 10 ug 11.
Gani gipaabot sab nga kun makompleto na ang gipamalit nga vest ihatag nila kini sa Special Weapons and Tactics (SWAT) Team.
Labot sa furniture ug fixtures sa bag-ong building sa CCPO Headquarters, si Paz nipasabot nga giproseso na nila kini karon ug duna lay kalangay nga nahitabo sanglit sa niaging tuig wala sila’y capital outlay.
Mahitungod sa gasoline, si Paz niasoy nga padayon nga nisuporta ang siyudad sa fuel allocation ug dili kini limitado.
“Continue gihapon ang gihatag sa city government nga support sa fuel. Wala tay gi-slash ana, actually, naa na silay gi-allocate for the whole month so dapat if mogamit sila for the month of August dapat mobuhat sila og report for the month of September na pud,” dugang ni Paz. (BANAT NEWS)
- Latest
