Duha patay sa bangga

CEBU, Philippines — Duha ang namatay sa dihang ang motorsiklo nga ilang giluwanan nabangga ngadto sa wing van nga sakyanan sa dalan M.C.  Briones sa eskina Barangay Pagsabungan, Dakbayan sa Mandaue sa miaging gabii.

Si Police Officer 1 Arvel Velez sa Traffic Division sa  Mandaue City Police Office (MCPO) miila sa nangamatay nga mao sila si Marlo Cotandar, 21, taga Labogon ug backrider nga babaye nga si Gb Lugabo, 24, taga Canduman  sa maong dakbayan.

Ang wing van gimaneho ni Enrique Requeto Lapis, 38, taga Dakbayan sa Lapu-Lapu.

Nasuta sa imbestigasyon nga si Lapis paingon sa amihanan sa dihang pag-abot niini sa eskina sa dalan Pagsabungan midesilya kini padung sa Pagsabungan Proper apan naatol  sa pag-overtake sa mga biktima ug nasampak sa wala nga bahin sa wing van niini.

Matud ni Velez, ang duha gidala ngadto sa Vicente Sotto Memorial Medical Center sa Dakbayan sa Sugbo apan gideklarar nga patay ang backrider ug pagkataudtaod namatay sab si Contandar. (Romeo T.  Limpangog/IBM)

Barkong pasaheroan nasunog

Nasunog ang usa ka barkong pasaheroan gikan sa Bohol nga adunay sakay nga 92 ka pasahero kagahapon.

Ang LCT Lite Ferry 28 nigikan sa Tagbilaran City sa alas 8 sa buntag ug gikatakdang moabot unta sa Argao alas 11 sa udto. Ang maong barko gidala ni Captain Jhonrey Saradillo ug sa 28 ka crew. Nahitabo ang aksidente 300 ka metros na lang sa Taloot Wharf sa lungsod sa Argao matud pa ni Chief Petty Officer Gerry Patenio sa Coast Guard.

Adunay 83 ka mga hamtong ug walo ka bata ug usa ka masuso ang sakay sa maong barko nga gipanag-iya sa Lite Shipping Incorporated. Walay natala nga namatay o naangol sa maong hitabo.

Base sa inisyal nga imbestigasyon, ang sunog nagsugod sa engine room niini. Dunay nadunggan nga piti-piti gikan engine room ug niulbo dayon ang kalayo. Gisulayan nila kini’g palong gamit ang fire extinguishers apan pakyas.

Nadawat sa Argao Municipal Disaster Risk Reduction and Management Office (MDRRMO) ang alarma 10:54 sa buntag hinungdan sa pagresponde sa ilang buhatan kauban ang mga sakop sa Sibonga MDRRMO, Bureau of Fire Protection- Dalaguete, ug Coast Guard.

Ang LCT Miami nga naghatud og mga trak sa Taloot Wharf  mitabang nga mabalhin ang mga pasahero ug tripolante sa nasunog nga barko.  Ang LCT Miami usab maoy gikargahan sa mga trak sa bombero nga miadto sa lawod aron pagngon ang kalayo sa nasunog nga barko.

Matud pa ni Senior Fire Officer Roel Gealon nga hingpit napawong ang kalayo alas 2:45 na sa hapon.  Si Chief Petty Officer (CPO) Gerry Patenio sa Coast Guard Substation (CGSS) Argao miingon nga nakadawat sila og distress signal gikan sa motor vessel Lite Ferry 28 sa 12:40 a.m. Siya midugang nga nahatod tanang pasahero sa safety ug walay samdan nila apan ilang girekomendar nga ipadala sila sa ospital apan nag-iyahay  sila og pamauli.

Si Patenio miingon nga base sa inisyal nilang imbestigasyon, sobrang kainit sa exhaust manifold ang sinugdanan sa maong sunog. Gawas sa mga pasahero, aduna usab upat ka sakyanan, duha niini kay 10-wheeler trucks, nga sakay sa maong sakyanan pandagat.

Si Seaman First (SN1) Phillip Michael Tan sa Coast Guard Station (CGS) Bohol, sa laing interbyu sa Banat News nagkanayon nga mibiya sa Tagbilaran City ang barko alas 8 a.m. ug maabot unta sa Taloot wharf sa 11 a.m. Matud niya nainspeksyon nila ang barko sa wala pa kini mibiya.

Si Lucio Lim Jr., presidente sa Lite Shipping Corporation miingon nga ang kompaniya mohimo og imbestigasyon aron di na kini masubli pa ilabi na nga kini pa maoy unang insidente nga may barko silang nasunog sulod na sa 28 ka tuig nilang operasyon.

Matud niya wala pay napulo ka tuig ang maong barko ug tulo pa ka tuig gikan napalit nga brand new ang makina niini. (BANAT NEWS)