Mabungahong Paglawig

CEBU, Philippines — Kanunay niyang gisulod sa iyang alimpatakan nga dili siya angayan malisang sa matag problema ug pagsulay nga moabot sa iyang kinabuhi, sanglit matuohon man siya nga mas dako gayud ang Ginoo kaysa sa bisan unsang suliran. Kinahanglan lang matod pa nga kanunay kitang mag-ampo ngadto Kaniya ug dili mosurinder sa pagkab-ot sa atong pangandoy.

Gumikan niini, natuman ni Cherry May Osabel Paug, 27, ang pangandoy niya  nga mahaw-as sa kalisod ilang pamilya. Usa na siya karon ka assistant pantry cook sa usa ka international company nga Royal Caribbean Cruises Ltd. (Liberty of the Seas).

Nahimugso ug nagtubo si Cherry sa Mandaue City diin kamagwangan siya sa tulo ka managsuon. Lisod gyud matod pa ilang pagpuyo kaniadto sanglit wala’y tarong nga trabaho iyang inahan ug pagpangahoy lang ang panginabuhian sa iyang amahan.

Aduna’y panahon nga nakasulod isip ordinaryong trabahante sa usa ka rattan company ilang mga ginikanan apan dili gihapon paigo ang mga kita niini aron masuportahan ang kinahanglanon sa pamilya. Giasoy sab niini nga naputos sila sa utang tungod sa ilang kalisod.

“Niabot pa gani to sa point nga wala jud mi makaon ug maplite sa padulong sa akong eskwelahan ug padulong sa trabahoan ni mama. Wala’y tarong kaon akong mga manghod nga mga bata pa jud kaayo,”paambit pa niini sa Banat News Tingusbawan.

“Sa akong nahinumduman, sardinas jud to ang pirmi namo madali-dali, sagulan og alugbati. Mangutang lang me sa tindahan sa among silingan og mga noodles o misua,”dugang pa ni Cherry.

Nagtungha siya sa Maguikay Elementary School gikan sa Grade 1 hangtod Grade 3 ug didto na nipadayon sa Opao Elementary School sa Grade 4.

Kay naglisod man sila, dili siya kanunay mahatagan og balon. Malipay na matod pa siya kon hatagan siya sa iyang inahan og P2.

“Problema kaayo nila mama ang pang-adlaw adlaw namo nga balon ug requirements sa klase,”niya pa.

Busa aron makapalit siya sa iyang mga projects, maghimo siya og ice water sa iyang iyaan ug pagahatagan siya niini og P20. Taliwala sa kalisdanan, kanunay gihapong malakip sa top 10 sa klase si Cherry ug gipasidunggan isip Most Obedient ug Journalist of the Year sa paggradwar niya sa elementarya.

Nipadayon siya og tungha sa Mandaue City Comprehensive National High School diin kapin duha ka kilometro ang gilay-on gikan sa ilaha. Hatagan lang matod pa siya og P20 sa iyang inahan, dala na sa iyang pamlite ug pampalit og pagkaon. Apan aduna gyuy panahon nga wala’y ikahatag iyang inahan busa padayon siyang naghimo og ice water ngadto sa tindahan sa iyang iyaan. Ang ihatag sa iyang iyaan maoy ibayad niya sa ilang testpapers matag exam ug ipalit og projects.

Gumikan sa kakugi ug determinasyon, nigradwar gyud siya sa hayiskul isip 6th honor.

Nipadayon siya og tungha sa kolehiyo sa Banilad Center for Professional Development sa kursong Hotel and Restaurant Services.

“I was a scholar sa Aboitiz so nalibre ko sa tuition. Aron naa koy pamlite, manglimpyo ko og balay taga Sabado ug Domingo. Hatagan pud ko og balon sa akong ig-agaw,”paambit pa ni Cherry.

Pokos sa iyang pagka working student si Cherry ug giangkon niini nga wala gyud kaayo siya nakapahimulos sa iyang pagkabatan-on niadtong panahona.

“Wala nako na-experience ang mahimong normal nga teenager kay focus man ko sa school and work sa rest days,”asoy pa niini kinsa nigradwar sa kolehiyo niadtong 2009 ug nakadawat og silver award.

Gibuligan gyud sa Kahitas-an si Cherry sanglit human siya nigradwar sa kolehiyo gikuha ra sab siya sa Marriott Cebu, diin didto siya nag on- the-job training.  Nagtrabaho siya isip kitchen helper sulod sa duha ka tuig dayon nibalhin sa Marriott Doha (Qatar) isip kitchen helper gihapon.

Tungod sa iyang nindot nga performance, na-promote siya isip commis 1. Tulo siya ka tuig sa maong posisyon ug dinhi matod pa nahulma iyang karera. Hangtod nga nabalhin siya sa Marriott al Jaddaf didto sa Dubai isip demi chef de partie.

Nalingaw si Cherry sa iyang kasinatian sa trabaho ug dili gyud matod pa siya bation og kakapoy sanglit duol man kini sa iyang kasing-kasing.

Gikan sa Dubai, nabalhin siya sa tallest hotel in the world, ang Marriott Marquis isip demi chef de partie gihapon. Human nakaangkon og daghang pagtulon-an ug kasinatian sa maong hotel, nibalhin siya sa Royal Caribbean Cruises Ltd. (Liberty of the Seas) isip Assistant Pantry Cook. Hangtod karon dinhi siya nagtrabaho.

Tungod sa iyang trabaho, nakalayag siya sa nagkalain-laing dapit sa kalibutan isip cook sa barko.

Gipaambit ni Cherry nga malipayon siya nga hinay-hinay na niyang nakab-ot ang iyang pangandoy sa kinabuhi. Usa ka dakong grasya alang kaniya nga makatrabaho sa mga dagkong hotels sa kalibutan. Ug tungod niini nahaw-as na niya sa kalisod ilang pamilya ug natabangan na sab niya iyang mga manghod sa pagkab-ot sa ilang mga pangandoy.

Giisip niyang inspirasyon sa kinabuhi mao ang Ginoo ug iyang pamilya. Kumbinsido sab siya nga gamhanan gyud kaayo ang pag-ampo, kay usa kini sa naghatod kaniya sa iyang nahimutangan karon.

“Prayers are really powerful. Never give up lang jud, never underestimate your capacities/talent kay magamit jud na nimu sa imong growth sa work and sa personal life,”sigon pa niya.

“I can do all things through Christ who strengthens me,”kutlo pa niya gikan sa Philippians 4:13.

Busa aghat niya ngadto sa mga kabatan-onan karon nga mangandoy gyud og dako aron magmalamposon sila.

“My advocacy is to influence younger generation to dream high and be successful when their time comes,”asoy pa niini.

Tambag pa  niya nga dili gyud kawad-an og paglaom bisan pa man nga nakasinati kita og dakong krisis sa kinabuhi. Kinahanglan nga mas dako atong pagsalig sa Ginoo kaysa sa atong gipas-an nga suliran sa kinabuhi.

“Always pray and believe that God is always bigger than our struggles. Never give up and be passionate in everything you do lang jud. When you love what you are doing, the rest will move smoothly.

“And always keep your feet on the ground, never forget the people who helped and inspired you when you were in need,”panapos pa niya.