30 elected govt workers sa Sugbo priso tungod sa drugas
CEBU, Philippines — Kapin 30 ka elected officials ug government employees sa lalawigan sa Sugbo ang nadakpan atol sa nagkadaiyang buy-bust operations sa otoridad sukad nga gilusad sa administrasyon ni Presidente Rodrigo Duterte ang kampanya batok ilegal nga drugas sa nasud.
Base sa datus sa Cebu Provincial Anti-drug Abuse Office (CPADAO) sa 37 ka mga kawani sa gobiyerno, 27 niini ang elected officials, pito ang uniformed personnel ug tulo ang empleyado sa gobiyerno dinhi sa Sugbo ang nasikop sa anti-drug operation sukad niadtong Hulyo 1, 2016 hangtod sa Hulyo 31, 2018.
Apil sa mga elected officials nga nadakpan sa anti-drug operation mao ang konsehal sa Barangay Can-asujan sa Dakbayan sa Carcar nga si Arvin Dela Fuente, 45 anyos.
P250 mil nga balor sa ilegal nga drugas ang nakuha sa maong konsehal niadtong Oktubre 2017.
Niadtong Enero karong tuiga, nasikop usab sa Provincial Intelligence Branch (PIB) ug Bantayan Police ang barangay kapitan sa Hilotongan, usa ka islet sa isla sa Bantayan nga si Rey Christopher Paclibar, 58 anyos.
Siya uban ang iyang asawa, igsoong lalaki ug ig-agaw ang nadakpan sa buy-bust operation kon diin nakuhaan sila og pakete sa shabu nga mobalor og P141, 000.
Si Ivy Durano-Meca ang pangulo sa CPADAO nagkanayon nga dako ang tahas sa mga opisyal sa gobiyerno pakigbatok sa ilegal nga drugas ug dili maayo nga sila maoy mismo ang nalambigit. (/IBM)(BANATNEWS)
- Latest
