Lapu-Lapu ilegal ang pagka-HUC?

CEBU, Philippines —  Aron masusi og balik ang plebisito kalabot sa pagkahimong highly urbanized city (HUC) sa Lapu-Lapu nagkinahanglan kini nga adunay petition ngadto sa Commission on Elections (Comelec) en Banc.

Kini human nga ang Korte Suprema nidesisyon nga ilegal ang pagka-HUC sa Lapu-Lapu tungod kay kulang og plebisito sa tibuok Probinsiya sa Sugbo aron mahimong legal ang conversion sa Lapu-Lapu ngadto sa pagka-highly urbanized city.

Si Bise Gobernador Agnes Magpale niawhag sa Comelec nga kompletohon ang rekisitos aron mahingpit na ang legalization sa conversion sa Lapu-Lapu.

Si Lionel Marco Castillano, Provincial Comelec Supervisor nagkanayon nga andam ang Comelec nga mopahigayon niini apan kinahanglan adunay petition nga i-file.

“They must file a petition with Comelec en Banc, asking to revisit kato nga plebisito if that would confirm to recent supreme court decision” matud ni Castillano kinsa niangkon nga nakapahigayon sila og plebesito kaniadto apan diha lang sa Dakbayan sa Lapu-Lapu. Si Castillano nagkanayon nga ang Comelec mamahimong mopahigayon og plebistio kalabot sa hingpit na nga paghimo sa Lapu-Lapu nga highly urbanized city apan sa pagkakaron wala pa kini sa ilang kalendaryo o schedule sanglit wala pa may petition nga na-file ug nagtutok usab ang Comelec alang sa umaabot nga midterm election sunod tuig.  (Le Phyllis F. Antojado/BDB)

300 ka priso sa CPDRC nakaparehistro sa Comelec

Niabot ngadto sa 300 ka piniriso diha sa Cebu Provincial Detention and Rehabilitation Center (CPDRC) ang nahatagan og kahigayonan nga makaparehistro atol sa gipahigayon nga offsite registration sa Commission on Elections (Comelec) kagahapon.

Matud ni Atty. Lionel Marco Castillano, provincial election supervisor nga ang maong mga piniriso nakarehistro na kini sa Barangay Kalunasan, Dakbayan sa Sugbo apan dili sila makabotar sa mga lokal nga kandidato sa umaabot midterm elections sa 2019, ang pwede nilang mabotaran mao lang ang mga national nga kandidato.

Sukad niadtong tuig 2010 giapil na sa Comelec ang mga priso nga makabotar atol sa piniliay aron sila mahatagan og kahigayonan makapili sa ilang gustong lider.

“Usual man gyud na namo, kay di ba ang thrust karon sa Comelec kay all inclusive voting, naa mi voting sa mga women and girls, amo na gipanghingusgan, sa mga priso, sa mga lugar nga naay indigenous people, ang LGBT, PWDs ug senior citizen”, matud ni Castillano.

Gawas sa CPDRC nipahigayon usab og offsite registration ang Comelec diha sa Cebu City Jail ug sa ubang district jails sa Probinsiya sa Sugbo.

Ang registration period alang sa midterm election sunod tuig nagsugod kini niadtong Hulyo 2 karong tuiga hangtud karong Septiyembre 29, 2018. (BDB) (BANATNEWS)