Klase sa Bantayan Island gikanselar

CEBU, Philippines —  Gumikan sa bati nga dagan sa panahon ug walay hunong nga ulan, hingpit nga gideklarar sa tulo ka lokal nga kagamhanan sa Isla sa Bantayan nga naglangkub sa kalungsuran sa Santa Fe, Bantayan ug Madridejos nga walay klase kagahapong adlawa.

Sa Lungsod sa Santa Fe, gisuspenso ni Mayor Jose “Titing” Esgana ang klase tungod sa walay hunong nga ulan tungod sa southwest monsoon kon habagat.

Matud ni Leah Escarlan, ang Local Disaster Risk Reduction Management sa Santa Fe, nga human sa walay hunong nga ulan kagahapon, ang tulo ka mga lungsod mideklarar og walay klase.

Sumala pa ni Escarlan, nga sa ila sa Santa Fe, alas nuwebe na sa buntag nakadeklarar og walay klase si Mayor Esgana human usab sa ilang rekomendasyon tungod sa walay hunong nga ulan ug pipila lang usab ka mga bata ang mitungha sa eskwelahan.

Gilantaw sa LDRRM ang kaluwasan sa kabataan hinungdan nga morekomendar gayud sila sa mga opisyal kon makita nila nga dili maayo ang dagan sa panahon. Gitug-an ni Escarlan nga kagahapon sa hapon, pagtutaligsik nalang ang ilang nasinati sa isla. (DILT) (BANATNEWS)