Bag-ong tourist destinations gipaila sa travel fair sa Kapitolyo

CEBU, Philippines – Gawas sa mga ilado na nga mga suroyanan sa Probinsiya sa Sugbo pipila ka mga lungsod ang nipasigarbo sa ilang bag-ong tourist destinations diha sa ilang lugar atol sa travel fair sa Kapitolyo.

Ang "Cebu Journeys" Travel Fair and Video Exhibit gipahigayon kini karon sa Provincial Tourism diin 20 ka Local Government Units ang niapil sa maong kalihukan diha sa Capitol Social Hall.

Ang tulo ka adlaw nga travel fair bukas kini sa publiko hilabina sa mga buot nga mosuroy diha sa mga tourist destination sa Probinsiya sa Sugbo. Ang mga LGU nipasigarbo kini sa ilang mga produktong lokal, pagkaon ug tour packages diin ang mo-avail niini maka-discount.

Usa sa mga nitanyag og tour package mao ang Lungsod sa Pilar, Isla sa Camote diin gi-promote niini karon ang Moabog Reef and Resort diha sa Barangay Moabog sa Pilar.

Adunay tulo ka tour package diin ang turista mobayad og P1,400; P1,800 ngadto sa P2, 800 depende sa package nga gikuha.

Matud ni Joselito "Boboi" Costas, pangulo sa tourism office sa Kapitolyo nga ang konsepto sa labing unang travel fair sa Kapitolyo mao ang organic materials sama sa banig ug bamboo.

Gawas diha sa social hall, adunay gibutang nga LED monitor diha sa Capitol Dome nga nagpakita og video sa mga tourist destination sama sa whale shark watching sa Oslob.

Matud usab ni Costas nga paagi kini aron hatagan og "teaser" ang mga bisita kon unsa ang ilang masinati sa ilang pagsuroy sa mga destinasyon sa Sugbo.

Ang maong travel fair subay kini sa selebrasyon sa ika-449th nga kasumaran sa Probinsiya sa Sugbo ug nagsugod kini kagahapon ug mahuman ugmang adlawa. (/BDB)(BANAT NEWS)