18 ka tawo nakalapas sa ordinansa sikop
CEBU, Philippines — Gisikop sa nagpatrolya nga kapolisan sa presinto 3 sa Lapu-Lapu City Police Office (LLCPO) ang 18 ka tawo kinsa giingong nakahimo og kalapasan sa gipatuman nga lokal nga ordinansa.
Ang maong mga dinakpan giingong gibuhian usab dayon sa kapolisan human mapahimangno-i.
Sa maong gidaghanon sa mga dinakpan dunay naaktohan kanila nga nag-inom diha sa publikong lugar, dunay naglakaw sa dalan nga half naked ug dunay naaktohan nga nag-estambay diha daplin sa karsada nga lawom na ang kagabhion.
Sa nasayran, lakip sa higpit nga gi-monitor sa kapolisan sa ilang pagpatrolya panahon sa kagabhion mao ang mga menor de edad apan tungod sa nagpadayon nilang pagpatrolya sa kabarangayan wala na silay na-rescue nga mga bata nga naglaroylaroy diha sa kadalanan panahon sa lawom na ang kagabhion.
Gisuhid usab sa nagpatrolya nga kapolisan ang mga internet coffee sa kabarangayan apan wala sila makamatikod og mga bata nga nagduwa og computer game panahon sa kagabhion.
Ang mga barangay nga nalakip sa gisuhid sa pagpatrolya sa kapolisan panahon sa gabii hangtud na sa kaadlawon mao ang Poblacion, Pajo, Babag, Canjulao, Calawisan, Looc ug Gun-ob. (BANAT NEWS)
- Latest
