P150 mil danyos sa sunog sa Guadalupe

CEBU, Philippines — Gibana-banang nikabat ngadto sa P150 mil ang danyos sa nahitabong sunog  kagahapon sa buntag diha sa M. Velez Street, Barangay Guadalupe, Dakbayan sa Sugbo. Hinuon walay natala nga naangol o nakalas sa maong insidente.

Alarma sa sunog nadawat sa kabomberohan alas 9:02 sa buntag ug giisa kini ngadto sa third alarm ug ang kayo nakontrolar alas 9:20 sa buntag ug na-fire out mga alas 10:33 sa buntag.

Si Chief Inspector Noel Nelson Ababon, Cebu City Fire Marshal nibutyag nga ang sunog nagsugod sa panimalay nga gipanag-iya ni Raquel Luciano nga giabangan ni Archie Vertucio ug upat ka panimalay ang hingpit nga naugdaw.

Ang kahagip-ot ug kalisud sa agianan maoy nasugatan nga problema sa kabomberohan diin uban kanila ang nigamit og ladder ug adunay nisaka sa mga tag-as nga building aron makabomba og tubig.

Ang kabomberohan nagpahigayon kini og imbestigasyon sa hinungdan sa sunog. (Kenna Kyla G. Calizar /BDB)(BANATNEWS)

Pito ka durugista sikop; mga marijuana gipanglarot

Rome T. Limpangog

CEBU, Philippines — Usa ka 56-anyos nga babaye kinsa suspetsadong drug pusher ang nasikop sa buy-bust operation sa kapolisan sa Presinto 2 sa Mandaue City Police Office (MCPO) sa miaging kaadlawon diha  sa dalan M. Logarta, Barangay Subangdaku, Dakbayan sa Mandaue.

Ang suspetsado giila sa kapolisan nga si Celsa dela Torre Padilla, 56, taga Barangay Carreta, Dakbayan sa Sugbo kinsa giingong nasakmitan og 21 ka gagmay nga paketeng shabu ug P400 nga buy-bust money.

Gawas kang Padilla, laing upat ka motorista kinsa giingong nagdala og shabu ang nasikop sa gipahigayong checkpoint sa kapolisan niadtong Biyernes sa gabii diha sa nahisgutang lugar.

Ang mga nadakpan mao sila si Arnel Mangubat, 24, taga Sangi, Pajo, Dakbayan sa Lapu-Lapu; Richard Carasena, 22, taga Sitio Lumboy, Inayawan, Dakbayan sa Sugbo; Jay Barado Selosia, 22, taga Cabildohan, Barangay Looc Dakbayan sa Mandaue ug Jay Apasan Limbaganon, 19, taga Sitio Aroma, Barangay Subangdaku.

Sa laing bahin,  nagtingkagol sa detention cell sa Talisay City Police Station ang inahan ug anak  human sila nasikop sa gipahigayong buy-bust operation sa kapolisan sa siyudad diha sa Sitio Rattan, Barangay Tangke, niadtong Biyernes sa gabii.

Ang nasikop mao si Marlyn Mangaron, 40, ug anak niining si Hardy Mangaron,18, ulitawo pulos nagpuyo sa maong dapit.

Si Marlyn giingong nasakmitan og 60 ka gagmay ug usa ka medium nga pakete nga shabu ug nagkalainlaing kantidad nga kwarta.

Samtang giingong nasakmit gikan kang Hardy ang 17 ka gagmay nga pakete ug usa ka medium nga pakete nga shabu, kalibre.38 nga revolver nga adunay tulo ka buhing bala.

Ang mga ebidensiya nga nakuha nitimbang tanan ngadto sa 15.10 gramos nga adunay kantidad nga P178,180.

Si Superintendent Marlu Conag, hepe sa kapolisan sa siyudad nibutyag nga si Hardy kinsa maoy ilang subject aduna usab kini pending warrant of arrest sa kasong homicide.

Sa laing bahin usab, nikabat ngadto sa 353 ka punoan sa marijuana nga mokantidad tanan ngadto sa P70,600 ang nalarot sa mga otoridad diha sa Barangay Pangamihan, Siyudad sa Toledo niadtong Biyernes.

Ang kapolisan niimplementar kini sa search warrant batok kang Gregorio Labandero, usa ka mag-uuma, residente sa Sitio Carbon, Barangay Pangamihan, sa nahisgutang siyudad.

Giingong nadiskubrehan sa kapolisan, Philippine Drug Enforcement Agency (PDEA)-7 ug mga opisyal sa barangay ang gipananom nga marijuana sa suspetsado kinsa daling nakasibat. (Gabriel C. Bonjoc ug Richel Ann P. Basiga/BDB)(BANATNEWS)