Police station ipaayo sa siyudad

CEBU, Philippines – Himoong presentable ang mga police stations sa Siyudad sa Sugbo aron hamugaway alang sa mga tawo nga moduol.

Gipahibawo ni Konsehal Dave Tumulak, chairman sa committee on public order and safety sa konseho sa siyudad, nga tabangan sa lokal nga kagamhanan nga mapadak-an ang Pardo ug Punta Princesa Police Station.

Padak-an ang ikaduhang andana sa Pardo Police Station ug usbon ang entrance niini samtang ang Punta Princesa Police Station ibalhin sa karaang barangay hall sa Labangon kay gawas nga dako ang lugar duna sab kini parking space ug ang karaan unya nila nga estasyon himoong prisohan.

Labot sa budget niini, si Tumulak niingon nga tabangan kini sa siyudad ug sa kapolisan.

Samtang gihangop sa hepe sa Talisay City Police Station ang tinguha ni Mayor Eduaro Gullas nga mobutang og sub-stations sa lainlaing dapit sa siyudad.

Matud ni Police Supt. Marlu Conag nga daku kini og tabang sa kapolisan ilabi na nga ang usa ka polis igo sa tres mil ka tawo.

Buot ni Conag nga butangan og sub-stations ang kadagatan, bukid, Tabunok, Tangke ug SRP ilabi na nga daghan sab ang mga establishments sa maong lugar.

Mahimo sab nga mohangyo sila sa ilang labaw sa kapolisan aron matabangan nga madugangan ang mga tawo nga ibutang sa mga sub-stations.

Problema sab nila ang kadaghang alarma apan maguba usahay ang ilang mga sakyanan.

Ang kapitan sa Barangay Tangke, Nelson Cabanes, nitug-an nga aduna na silay duha ka barangay outpost alang sa kapolisan ug mga barangay tanod.

Tinguha nila nga mahunong na ang pagkuyanap sa drugas sa ilang lugar. (Rowena D. Capistrano/GMR)(BANAT NEWS)