Giingong pari sikop sa entrapment sa NBI
CEBU, Philippines – Nasikop sa entrapment operation sa National Bureau of Investigation (NBI) kagahapon sa buntag ang usa ka nagpailang missionary priest kinsa giingong nasakmitan og mga peke nga driver’s license.
Ang dinakpan giila nga si Reverent Father Guillermo Leonardo Olaivar, Jr., 62-anyos, taga Duero Probinsiya sa Bohol ang nasakmitan og 33 ka peke nga driver's license sa mga ahente sa NBI.
Si Olaivar nihimakak sa maong pasangil batok kaniya ug nangangkon kini nga adunay niduol kaniya nga usa ka "Janjan" diha sa usa ka mall aron dalhon ang mga pinutos nga dokumento apan kalit lang siya nga giduol sa mga sakop sa NBI ug dayon gisikop.
Si Atty. Wenceslao Galendez, Jr., supervising agent sa NBI-7 nagkanayon nga ang Land Transportation Office (LTO) maoy nagpatabang kanila nga madakpan ang suspetsado tungod sa giingong ilegal nga binuhatan niini.
Giingong saaran ni Olaivar ang kliyente niini nga makakuha og lisensiya sanglit nangangkon kini nga anaa sa LTO nagtrabaho.
Si Galendez nagkanayon nga si Olaivar mag-atubang og kasong pagpameke og dokumento o possession of falsified documents.
Si Olaivar nasayran nga kanhi nagtrabaho sa LTO ug sakop sa The Marian Movement of Priest ug aduna kini asawa ug upat ka anak.
Nasayran nga ang The Marian Movement of Priest usa ka pribadong asosasyon sa Katoliko nga mga pari ug mga layko nga natukod niadtong 1972 sa nasud sa Italy. (/BDB)(BANAT NEWS)
- Latest
