97-anyos gigulgol namatay

CEBU, Philippines — Usa ka 97- anyos ang napalgang patay ug adunay ginulgolan sa liog sa gawas sa iyang gitrabahoang vulcanizing shop sa Barangay Cambang-ug, Dakbayan sa Toledo niadtong Domingo sa gabii. Giila sa Toledo Police Station ang biktima nga si Menesio Alicaba Igana, residente sa barangay Canlumampao sa maong dakbayan.

Sumala pa sa imbestigador sa maong kaso nga si Senior Police Officer 1 Thule Tahadlangit nga alas-7 sa gabii sa maong adlaw napalgan sa mga residente sa maong dapit nga nagkadugo ug wala nay kinabuhi ang lawas sa maong biktima nga anaa sa usa ka duyan.

Gawas sa ginulgolan sa liog, aduna sab kini samad tinigbasan iyang walang bukton.

Sa pasiunang imbestigasyon sa maong polis, nasuta nga di lang dugay nahitabo ang maong krimen sanglit presko pa kaayo ang dugo niini.

Butyag niya nga adunay nakakita nga hubog ang maong biktima nga natulog sa maong duyan, pangagpas karon nila nga gitripan ra kini sa mga mamumuno kay wala man kini kaaway. Ang mga samad sa iyang bukton gituohang inagian sa iyang pagsagang sa pagtigbas kaniya.

Adunay napalgang hinagiban sa posesyon ni Igana apan matud pa nga dili kini mao ang gigamit sa krimen sanglit wala kini mahulbot gikan sa sakuban nga gitakin niini.

Sa laing hitabo, 76 anyos nga lolo natagak sa 15 metros (45 ka tiil) nga  pangpang sa Barangay Poblacion 1, Dakbayan sa Carcar niadtong Lunes sa buntag.

Ang nakalas giila sa Carcar Police Station nga si Eustaqisio Balberora,

Matud pa ni Police Officer 2 Celso Yanong nagdala og tulo ka mga galloon sudlanan og tubig si Balberora kay magsag-ob kini og tubig bisan gihilantan kini.

Ang lugar nga iyang giagian bakilid ug dihang nawad-an og balanse natagak kini sa maong pangpang ug gituohang naigo ang ulo sa ubos hinungdan sa iyang kamatayon. (/IBM)(BANATNEWS)