Adbokasiya batok drugas, basura ipasalida sa sinehan

CEBU, Philippines — Giduso sa konseho sa Siyudad sa Sugbo ang pagmando sa mga sinehan nga magpasalida og video nga dunay adbokasiya batok sa ilegal nga drugas ug ang saktong paglabay sa basura.

Si Konsehal Eugenio Gabuya Jr. nagtuo nga mas daghan ang makaagni kun makita nila sa dili pa ipasalida ang movies sa mga sinehan.

Sa pagkakaron anaa pa sa committee on laws, ordinances, and styling ang maong ordinansahon aron matun-an.

Multa sa makalapas unya niini mao ang P1,000 ngadto sa P5,000 nga dunay apil nga pagkapriso depende sa korte.

Ang kampanya batok sa ilegal nga drugas ug ang waste management ang duha sa mga giatiman og maayo sa siyudad karon.

Matud ni Gabuya nga ang Cebu City Environment and Natural Resources Office ug ang Cebu City Office for Substance Abuse Prevention ang maghimo sa maong mga video kung maaprobahan na ang ordinansahon.

Gitahasan sab ang City Treasurer’s Office nga mo-implementar niini kun maaprobahan sa konseho ug sa mayor.

Hinoon moagi pa kini og public hearing nga mopatawag sa tanang tag-iya og sinehan sa siyudad aron mapahibalo sa bag-ong polisiya sa siyudad. (/GMR)(BANATNEWS)