‘Oratio Imperata’ sugdan sa Domingo

CEBU, Philippines – Ilusad na karong Domingo ang Oratio Imperata sa sunod-sunod nga patay ilabi na sa Sugbo nga himoon matag human sa pangalawat sa tanang Santos nga Misa sa mga Simbahan.

Matud ni Cebu Archbishop Jose Palma nga ang sunod-sunod nga patay nga gihimo sa wala mailhing mamumuno nakapabalaka na sa katawhan ug nakapasubo kanila ug dili sila buot nga ang pagpamatay mahimong normal.

Ang Oratio Imperata nag-ingon nga, “Langitnong namong Amahan, tinubdan sa kinabuhi ug sukaran sa kalinaw, kaming imong mga anak nasubo, nabalaka ug nahangawa tungod sa sunod-sunod nga pagpatay sa among mga igsoon. Nangaliyupo kami kanimo: pukawa ang hunahuna sa wala magpakabana, samoka ang tanlag sa nagpasiugda, kablita ang kasingkasing sa mga miuyon, hupaya ang dughan sa mga naguol. Tagai kamig kaisog sa pagsupak sa mga dautan, sa pagbuhat ug maayo, ug sa pagsalikway sa mga hiwing pamaagi. Panalipdi kami sa mga bakak sa yawa, ug palingkawasa ang among nasud sa gahum sa dautan.

Kini among gipangayo pinaagi ni Kristo among Ginoo. Maria among inahan, iampo mo kami. San Miguel Arkanghel, iampo mo kami. San Pedro Calungsod, iampo mo kami.” (/GMR)(BANAT NEWS)