14 sikop sa drug raids sa Talisay, Cebu ug Cordova
CEBU, Philippines – Niabot ngadto sa 14 ka tawo ang nasikop sa gipahigayong drug operations niadtong Martes sa kapolisan sa mga dakbayan sa Talisay ug Sugbo ug Lungsod sa Cordova.
Sila si Armolino Bolitas, 32, taga Sitio Tunob-lapok, Barangay Inayawan, Siyudad sa Sugbo ug Fernando Lomocso, hingkod ang panuigon, taga Whiteland, Barangay Tuyan, Siyudad sa Naga nasikop atol sa gipahigayong patrolya sa Regional Mobile Force Battalion (RMFB) diha sa Barangay Maghaway.
Samtang sa gipahigayon nga checkpoint diha sa Carmen Village, Barangay Poblacion nasikop ang motorista nga si Jesus Paulo Mirafuentes, 41, taga Sitio Magdooc, Barangay Cantao-an, Siyudad sa Naga kinsa giingong nagmaneho sa iyang motorsiklo nga walay lisensiya ug walay rehistro ang sakyanan niini ug giingong nakuhaan usab kini og lima ka gagmay’ng paketeng shabu.
Laing nasikop mao sila si Ivan Franz Sardoncillo, 40, taga Cogon, Pardo, Siyudad sa Sugbo ug si Raziel Gabuya, 31, parehong electrical technician, Donie Ray Del Rosario, 29, taga Barangay Cansojong ug si Darwin Bastida, 29, taga Sitio Pandong-bato, Barangay Media Once, Dakbayan sa Toledo.
Sa laing bahin, nasikop ang unom ka mga pusher og shabu atol sa drug operation sa kapolisan diha sa managkalahing dapit sa Lungsod sa Cordova.
Diha sa Sitio Ylaya, Barangay Ibabao sa maong lungsod niadtong Martes sa hapon nasikop si Gilbert Dungog Maneja, 33, Junmar Manacio Degamao, 28 ug Ramon John Manacio Degamo, 21, kauban sa 16-anyos nga bayongbayong.
Laing nadakpan diha sa Sitio Bantayan, Barangay Poblacion sa maong adlaw sila si Ronald Bayani Orbiso, 18 ug Jaylord Paca Rosani, 30, nga pulos nagpuyo sa maong dapit.
Samtang sa Sitio Lower Kawayan, Barangay Sambag 2 nasikop si Jeffrey Capareda, 45, kinsa giingong nasakmitan og shabu atol sa buy-bust operation. (Romeo T. Limpangog ug Rowena D. Capistrano/BDB)(BANAT NEWS)
- Latest