Opisyales sa Tanke nabalaka; 11 sikop sa drug raids

CEBU, Philippines — Nabalaka ang mga opisyal sa Barangay Tanke, Siyudad sa Talisay kon mawagtang na ang mga sakop sa Regional Mobile Force Battalion (RMFB) diha sa ilang lugar.

Si Superintendent Marlu Conag, hepe sa kapolisan sa siyudad nibutyag nga nipadayag ang mga opisyal sa ilang kabalaka nga dali lang madestino ang mga RMFB diha sa ilang lugar hinungdan nga ang kadagkuan sa Police Regional Office (PRO)-7 ug  Cebu Provincial Police Office (CPPO) nibisita diha sa Barangya Tanke.

Hinuon gipasalig ni Conag nga dili mawagtang ang RMFB diha sa lugar diin dunay proper turnover niini ngadto sa mga incoming nga opisyal.

Mga  kapin sa semana pa lang sukad sa pagbutang og mga sakop sa RMFB diha sa  Barangay Tanke niabot na ngadto sa 45 ka tawo nga giingong nalambigit sa ilegal nga drugas ang nasikop.

Nunot niini, tulo ka durugista maoy labing uwahing nasikop sa mga sakop sa RMFB diha sa Barangay Tanke niadtong Lunes sa hapon.

Ang mga nasikop mao sila si Reynaldo Candol, 40-anyos, minyo, taga Barangay Lamac, Lungsod sa Pinamungajan; Joevany Argabio, 36, taga sitio Candaya, Barangay Mohon sa maong dakbayan ug James Carlo Dimaano, 30, taga Barangay Langtad, Siyudad sa Naga. Giingong ang tulo nakuhaan og tagsa ka gagmay’ng pakete sa shabu. Sa laing bahin, lima ka pusher sa Dakbayan sa Lapu-Lapu ug laing tulo sa Lungsod sa Cordova ang nasikop sa gipahigayong drug operations sa kapolisan kagahapon sa kadlawon.

Ang mga nadakpan mao sila si  Ramil Albios Sabella, 45; Ruel Castro Garro, 43; ug  Rosilyn Garro Paunil, 41, mga residente sa Sitio Mustang, Barangay Pusok, Dakbayan sa Lapu-Lapu ug nasakmit gikan kanila ang  3.82 gramo nga shabu nga nagkantidad og P45,076 base sa Dangerous Drug Board (DDB) value.

Samtang sa karaang PUJ terminal diha sa dalan Punta Rizal sa Barangay Pajo sa maong dakbayan nasikop si  Vigyl Macazero Borces, 41 ug  Roger Lazarte Bargamento, 43, kinsa ang duha giingong nasakmitan og usa ka 0.72 gramo nga  shabu nga nagkantidad og P8,496 base gihapon sa  DDB  value.

Sa Purok 6 sa Barangay San Miguel, Lungsod sa Cordova nadakpan sa buy-bust operation sila si Allan Nasuli  Berdin, 35, Renante Bato Baguio, 41, ug Grace Salado Majan, 44, pulos nagpuyo sa maong dapit. Nasakmit  gikan sa maong mga dinakpan ang P300 nga buy-bust money, 12 ka gagmay nga pakete  ug usa ka medium size nga shabu nga ang tanan nagkantidad og P42,248.00 base sa DDB value. (BANAT NEWS)