Nursing grad konbiktado sa trafficking

CEBU, Philippines — Nahukman og life imprisonment niadtong Lunes ang 32-anyos nga lalaki nga nursing graduate kinsa nadakpan sa entrapment operation sa Dakbayan sa Sugbo sa kasong child trafficking niadtong tuig 2014.

Ang gikonbikto mao si Eul Vincent Ondoy Rodriguez, taga Tabunok, Dakbayan sa Talisay.

Matud sa International Justice Mission (IJM) nga gawas sa life imprisonment, gimando sab ni Judge Ester Veloso sa Cebu City Regional Trial Court Branch 6 nga pabayron si Rodriguez og P2.6 milyones alang sa damages nga namugna niini.

Si Rodriguez ang ika-39 nga nakonbikto sa child trafficking ug online sexual exploitation sa Pilipinas.

“Today’s conviction of another online trafficker – the 39th such conviction – is a reminder that the Philippine justice system is defending the rights of innocent children from the violence of online sexual exploitation. Online traffickers who rob children of dignity and freedom will only, in the end, forfeit their own freedom as the courts deliver justice for victims of OSEC (Online Sexual Exploitation of Children) throughout this nation,” matud ni IJM Cebu Field Office director, Atty. John Tanagho.

Nadakpan sa entrapment operation sa usa sa mga hotel sa Dakbayan sa Sugbo si Rodriguez

Ang Regional Intelligence Division (RID) ug ang Regional Anti-Human Trafficking Task Force (RAHTTF) sa Philippine National Police ang nagpaluyo sa entrapment operation batok kang Rodriguez niadtong Pebrero 13, 2014 diin dala niya ang 13-anyos nga batang lalaki nga maoy iyang gibaligya sa police decoy.

Butang nga una na nga gihimakak ni Rodriguez.

Sa korte gibutyag sa 13-anyos nga biktima nga kapin sa 20 ka higayon nga pahuboon siya ni Rodriguez atubangan sa camera alang sa iyang mga langyaw nga mga kliyente nga nagtan-aw bugti sa salapi. (BANAT NEWS)