Senior citizens sa Mandaue nakadawat sa ilang cash aid

CEBU, Philippines — Gipahigayon kagahapon sa buntag ang ceremonial distribution nga cash assistance sa mga senior citizen gikan sa 27 ka barangay sa Dakbayan sa Mandaue.

Ang buhatan sa City Social Welfare (CSW) maoy nagpasiugda sa kalihokan nga giabagan usab sa ilang mga barangay opisyal ug mga opisyal sa dakbayan nga gipangulohan ni Mayor Luigi  Quisumbing.

Si Jun Veliganio, public information officer (PIO) sa dakbayan nga nahinabi sa Banat News miingon nga ang Barangay Guizo ug Mantuyong maoy nakadawat sa maong hinabang.

Dugang pa niya nga gihimo ang ceremonial distribution didto   sa sulod sa Mandaue City Cultural and Sports Complex.

Isunod dayon ang uban pang mga barangay  didto sa ilang mga barangay gymnasiums.  Si Veliganio mipasabot nga mokabat sa P6 mil ang madawat matag tuig sa mga senior citizen sa dakbayan nga bahinon katulo sud sa usa ka tuig.

Niadtong bulan sa Marso nahatag na ang unang hugna sa cash assistance ug gisundan kini karong bulana ug ang ikatulong hugna sa Diyembre niining tuiga. (BANAT NEWS)