Peter Lim hadlok mapriso

CEBU, Philippines —  Bahad sa director sa Cebu City Police Office, Senior Supt. Royina Garma, nga angayang mahadlok ang kontrobersyal nga negosyante nga si Peter Lim kun molusot na ang warrant of arrest batok kaniya.

Kini gumikan kay alerto ang tibuok kapolisan sa pagdakop kaniya ug ipakatap nila sa publiko ang hulagway ni Lim.

Dugang niya nga wala maanad og kalisud sa pagpuyo si Lim hinungdan nga angayan siya mahadlok madakpan sanglit walay special treatment sa bilanggoan.

Giawhag ni Garma ang publiko nga kun molusot na ang warrant of arrest ni Lim ug makit-an nila kini, isumbong sa kapolisan ang iyang lokasyon aron nga madakpan na kini.

Dugang sa direktor nga samtang wala pa ang warrant of arrest kasamtangan silang nangalap og mga impormasyon sa nahimutangan sa negosyante.

Gibasura sa Department of Justice ang petisyon ni Lim nga ipaundang ang criminal proceedings ug gipasaka ang kasong kalapasan sa Section 26 sa Republic Act 9165 o ang Comprehensive Dangerous Drugs Act batok kaniya sa Makati City Regional Trial Court. (BANAT NEWS)