Pulos may shabu nadakpan sa checkpoint
CEBU, Philippines — Nadakpan sa kapolisan ang lima ka motorista sa checkpoint nga gipahimutang sa F. E. Zuelleg Avenue sa Barangay Centro, Dakbayan sa Mandaue alas 9 pasado hangtud sa alas 11 pasado sa niaging gabii.
Si Chief Inspector Aldren Villacampa, hepe sa Presinto 1 sa Mandaue City Police Office, maoy nangulo sa checkpoint kinsa niila sa mga dinakpan nga naglakip ni Jeffrey Crisostomo, 33, taga Ubos, Poblacion, Lungsod sa Cordova.
Nadakpan sab ang iyang kauban nga angkas sa motorsiklo nga giila nga si Ariel Cañete, 46, nagpuyo sa maong dapit ug ang maong mga dinakpan ang nasakmitan sa kapolisan og 25 ka gagmay nga pakete sa shabu.
Nadakpan sab ala una pasado sa kaadlawon sila si Jonard Inihao, taga Zone Litob, Barangay Calawisan, Dakbayan sa Lapu-Lapu ug nasakmit gikan niini ang duha ka medium size nga pakete sa shabu.
Laing nadakpan mao sila si Emilio Saberon, 41, taga Cambiohan, Barangay Casili ug Jesus Bertudaso, 50-anyos, minyo nga nagpuyo sa maong dapit.
Ang duha ka dinakpan ilang nasakmitan og duha ka gagmay nga pakete sa shabu ingon man ang giluwanan nga motorsiklo.
Si Police Officer 3 David Omambac, desk officer on duty sa Presinto 1 sa MCPO, niingon nga ang maong mga dinakpan temporaryo nga gitanggong sulod sa ilang detention cell. (BANAT NEWS)
- Latest
