Angkas gipaboran?

CEBU, Philippines — Gikwestiyon sa ubang sakop sa konseho sa Siyudad sa Sugbo ang giingong “inconsistency” sa report sa committee on laws, ordinances, and styling nga misuporta sa joint venture project sa siyudad ug sa Angkas.

Nasayran nga naaprobahan ang committee report ni Konsehal Sisinio Andales kay gisuportahan kini sa laing walo ka alyado sa konseho.

Ang maong report ni Andales mahitungod sa endorsement ni City Administrator Nigel Paul Villarete kinsa maingon nga nag-evaluate ang siyudad sa unsolicited proposal sa Angkas nga gustong magbuhat og pilot testing sa proyekto.

Matud ni Villarete nga sa maong project gustong han-ayon ang habal-habal drayber sa siyudad lakip na ang paggamit og application alang sa online booking system.

Sigon ni Andales nga walay ilegal nga probisyon sa propose nga memorandum of agreement nga pirmahan sa siyudad ug sa Angkas.

Giaprobahan ang report nilang konsehal Andales, Margarita Osmeña, Mary Ann de los Santos, Joy Augustus Young, Alvin Arcilla, Eugenio Gabuya, Jerry Guardo, ug Franklyn Ong. Samtang tulo ka konsehal nga mibotar batok sa report ug mao silang Jocelyn Pesquera, Pastor Alcover,Jr., ug Erik Espina. Wala mobotar sila si konsehal Renato Osmeña, Jr., Jose Daluz III, Joel Garganera, Raymond Alvin Garcia, ug Eduardo Rama.

Matud ni Pesquera nga wala siya makasabot nganong giaprobahan ni Andales ang Angkas nga joint venture project sa siyudad bisan og gi-reject sa komitiba ni Andales ang ordinansa ni Konsehal Pastor Alcover, Jr. nga gustong i-regulate ang habal-habal.

Sigon ni Pesquera nga kon ilegal ang pag-regulate sa habal-habal, ilegal sab ang Angkas kay pareha ra kini sa habal-habal. Apan matud ni Konsehal Margarita Osmeña nga ang pag-aprobar sa report ni Andales dili ingon nga mopirma na ang mayor sa kontrata kay kinahanglan pa kini og resolusyon. (/DILT)(BANATNEWS)