Tulo ka pagpamusil sa Mandaue, usa patay

CEBU, Philippines – Usa ang patay ug duha ang naangol sa tulo ka managlahing pagpamusil sa Dakbayan sa Mandaue sa niaging Martes sa gabii.

Lakip sa biktima ang usa ka babaye nga kuyog sa iyang hinigugma sulod sa sakyanan nga nakuhaan sab og shabu sa nitubag sa alarma nga sakop sa kapolisan.

Ang namatay giila ni Senior Police Officer 1 Rey Patigdas sa Presinto 5 sa Mandaue City Police Office nga si Jaypee Carayo, 30, taga Sitio Orchids, Barangay Opao diin alas 11 pasado sa gabii dihang kalit lang gipusil samtang nagduwa og computer game sulod sa internet café.

Matud ni Patigdas nga nakahigayon pa unta sa pagdagan paingon sa gawas ang biktima apan gigukod kini sa wala hiilhing mamumuno ug gitiwasan hinungdan sa iyang kamatayon.

Samtang grabe nga naangol ang 34-anyos nga tig-bulkit sa vulcanizing shop dihang kalit gipusil sa nagsakay og motorsiklo sa Sitio Tribunal, Barangay Centro alas 7:50  sa niaging Martes sa gabii.

Si Senior Police Officer 3 Gregorio Cabizares sa Presinto 1 sa MCPO niila sa biktima nga si Michael Maringguran kinsa nakabaton og samad pinusilan sa iyang walang bukton ug dali kining gidala sa Mandaue City Hospital.

Matud ni Cabizares nga ang biktima nakahigayon sa pagdagan samtang ang mamumuno dali nga nisibat.

Naangol sab ang usa ka babaye nga nagpaabot sa iyang higala sulod sa sakyanan kauban sa iyang hinigugma dihang kalit kining gipamusil alas 11 pasado niadtong Martes sa gabii sa Sitio Pilit, Barangay Cabancalan.

Giila ang biktima ni Police Inspector Lino Baylosis sa Presinto 4 sa MCPO nga si Evangeline Tinador, 28, taga Cotcot, Lungsod sa Liloan.

Kuyog sa biktima sulod sa sakyanan ang hinigugma nga si Dennis Emmanuel Cruz kinsa wala naigo dihang dali kining nakahupo.

Matud ni Baylosis nga ang nirespondeng kapolisan nakakaplag og medium ug gagmay nga pakete sa shabu ug mga plastic nga may lama sa shabu, duha ka glass tubes, mga disposable lighter ug kabhang sa bala sa .45 caliber pistol sulod sa sakyanan sa biktima. (/GMR)(BANAT NEWS)