Osmeña may death threats

CEBU, Philippines – Si Cebu City Mayor Tomas Osmeña mipahibalo pinaagi sa social media nga nakadawat kini og laing hulga sa kinabuhi ug iyaha kining gi-post sa iyang Official Facebook page.

Sa post sa mayor siya miingon nga kon dunay mahitabo ang kompletong texts nga naa ang tanang ngalan sa mga nagkalain-lain tawo ipagawas, ang mayor daan nang namasangil sa kapolisan nga maoy responsable niining mga sagunson nga mga pagpatay dinhi sa Sugbo.

Sa miaging semana, napatay ni William Macaslang nga bodyguard sa kaalyado ni Osmeña nga kagawad sa Tejero nga si Jessielou Cadungog si PO3 Eugene Calumba ug nadakpan ang drayber niini nga si Michael Banua.

Ang kampo ni Cadungog mipasangil nga si Calumba suway untang mobanhig sa kagawad apan naunhan kini sa bodyguard. Apan ang kapolisan kusganong mihimakak nga hitman si Calumba ug kini igo rang nag-surveillance sa Tejero isip sakop sa Drug Enforcement Unit sa Parian Police Station.

Apan ang dapit diin nahitabo ang ‘ambush’ nga diin niresulta sa iyang kamatayon, dili sakop sa maong police station ug nasuta usab base sa record nga gipagawas sa PRO-7 wa madestino si Calumba sa Parian kondili sa Traffic Patrol Group.

Daghan usab ang natingala nganong ang record ni Calumba sud sa nakalabay nga siyam ka buwan, kasiyam usab kini gibalhin-balhin og destino ug duna pay adlaw nga kaduha siya nadestino sa lagyong lugar.

Sila si Cadungog ug Macaslang mao na karoy nag-atubang og kaso tungod sa kamatayon ni Calumba.

PNP naratol

“With the identification of the hitman from his botched assassination being connected to other murders, there are high ranking policemen who are very rattled at the moment. But, we will leave the being rattled to them. The safety of the Cebuanos is precious, and I will not allow them to be made slaves to fear. I will do what I must to give Cebu a police, her people can trust. Until that happens, I will not back down,” tipik sa post sa mayor.

Giangkon sa mayor nahulga siya gamay niini apan iyang gipaneguro sa mga Sugbuanon nga dili  siya mobiya sa iyahang responsibilidad isip amahan sa siyudad.

Taliwa sa mga hulga nga iyang nadawat wala’y plano si Osmeña nga ipa-blotter ang maong hitabo sa kapulisan ug wala ra siya’y aksyon nga buhaton dungan sa pagbutyag nga dili angayan mabalaka ang mga tawo niya.

Si Cebu City Police Office Director Sr. Supt. Royina Garma giingong andam mohatag  og SWAT personnel nga mobantay kang Osmeña apan mibalibad ang mayor.

“Just tell them to put them in the Mobile Patrol and secure the people of Cebu never mind me I will take care of myself. My obligation is the safety of the people of Cebu not my safety, if I were worried by my safety I will resign. You don’t like to have a Mayor that is only worried about themselves,” matud ni Osmeña.

Way report

Si Garma miklaro nga wala siya’y nadawat nga impormasyon gikan sa duha ka mga police escorts ni Osmeña kabahin sa giingong death threats.

Nag-post sa social media og screenshot sa text message si Osmeña nga nadawat sa iyang pamilya diin nag-ingon mga paampingon siya, si Cebu City Councilor Dave Tumulak, ug si Cadungog.

Matud sa maong mensahe nga gipaluyohan sa mga kadagkoan sa Police Regional Office-7 ang grupo ni anhing PO3 Calumba.

Way hitmen

“May mga units organized to fight against illegal drugs pero walang units na in-organize para pumatay ng pumatay,” panghimakak ni Garma.

Si Garma miingon nga kon kompirmadong may hulga sa kinabuhi sa mayor andam siyang padugangan ang security details niini.

Si Cebu Archbishop Jose Palma sa Archdiocese of Cebu sa iyang bahin nagtuo nga tinuod ang pangangkon sa mayor nga adunay hulga sa kinabuhi niini.

Matud pa ni Palma, usa ka malinawon nga dapit ang Sugbo, apan tungod sa mga nahitabo karon may kahadlok na sa palibot. Dili lang mga nalambigit sa ilegal nga drugas apan lakip na usab ang mga opisyal ug mga yanong lumolupyo ang nalisang.

Apan siya miklaro nga misalig siya sa kapulisan tungod kay adunay mas daghang tarong gawas lang sa pipila nga wala mosunod sa ilang gipanumpaang kaakohan. (Camille Pateres ug Rowena Capistrano/IBM)(BANAT NEWS)