60 ka estraktura sa Barangay Pusok gitiwas og demolish

CEBU, Philippines – Gipadayon kagahapon sa buntag sa kagamhanan sa Dakbayan sa Lapu-Lapu ang pag-demolish sa nahibilin nga 60 ka estraktura diha sa Sitio Sta. Maria, Barangay Pusok sa nahisgutang siyudad.

Ang maong mga estraktura mao na lang kini ang nahibilin sa 3,000 ka estraktura diha sa lugar nga gipang-demolish sa pagpatuman sa three-meter easement zone diha sa Mactan Channel.

Sa nasayran ang siyudad nihatag kini og tukmang lugway nga panahon ngadto sa mga tag-iya sa gipang-demolish nga mga estraktura.

Naglakip sa mga lakang nga gihimo sa kagamhanan mao ang pagbutang daan og mga marka sa maguba nga estraktura nga naglakip na sa gipangtukod nga tangkal sa baboy.

Si Mayor Paz Radaza  sa iyang pamahayag sa nangaging demolition nga gipatuman sa siyudad ang paghatag og  financial assistance  alang sa mga ni-qualified nga mga naapektohan tungod kay dili man makahatag ang siyudad og relocation site nga ilang kabalhinan.

Nisanong hinuon sa awhag sa mayor ang pipila ka mga tag-iya sa boarding house ug mga piggery   ug nangunay kini sa pagpangguba sa ilang mga estraktura.Sa wala pa mahitabo ang demolition ang kagamhanan sa dakbayan dugay na nga nagpadala og pahibalo ngadto sa mga tag-iya nga nag-awhag sa pagbakante na sa maong dapit  tungod kay adunay demolition nga pagahimuon. (/BDB)(BANAT NEWS)