Curfew padayong gipatuman sa Lapu-Lapu

CEBU, Philippines – Gipadayon sa pagpatuman sa Lapu-Lapu City Police Office ang curfew hour ordinance alang sa mga bata pinaagi sa pagpatrolya panahon sa gabii.

Ang maong ordinansa nagdili sa mga menor de edad nga magsuroy-suroy sa alas 10 sa gabii hangtud sa alas 4 sa kaadlawon kung diin ang masigpatan sa kapolisan ilang hiposon pinaagi sa paghatud pauli sa ilang panimalay ug pahimangnoan ang mga ginikanan.

Nunot sa nagpadayon nga pagpatrolya, ang kapolisan sa Presinto 3 sa LCPO nga gipangulohan ni Senior Police Officer 3 Esperedion Blancia ubos sa pagsuperbisar sa deputy chief nga si Police Senior Inspector Ronnie Acar ang nakasikop og usa ka tawo nga nanigarilyo sa publikong lugar alas 12:10 sa niaging tungang gabii.

Samtang tulo sab ka menor de edad ang ilang gihipos pinaagi sa paghatud pauli sa ilang mga ginikanan ug gipahimangnoan nga makabayad na sila og multa sa ikatulong higayon nga pasagdan gihapon nila ang ilang mga anak nga anaa pa sa gawas bisan lawom na ang kagabhion.

Samtang sa Poblacion Oriental, Lungsod sa Consolacion maoy namatikdan nga adunay mga bata nga magduwa og computer game bisan lawom na ang kagabhion.

Si Barangay Kapitan Arnulfo Abinales niingon nga kasamtangan karon nilang gihimo ang pagbadlong sa mga internet café.

Ilang gipahimangnoan nga gidili gyud ang pagpasulod sa mga bata dili lang panahon sa gabii kun dili sa panahon sab sa tingklase. (/GMR)(BANAT NEWS)